भारतीय प्रधानमन्त्री नरेन्द्र मोदीले आगामी जुलाई ११ मा अकल्याण्डमा आयोजना हुने विशेष सामुदायिक कार्यक्रममा १० हजारभन्दा बढी भारतीय मूलका नागरिकलाई सम्बोधन गर्ने भएका छन्। उनको न्युजिल्याण्ड भ्रमणलाई यहाँको भारतीय समुदायले ऐतिहासिक अवसरका रूपमा लिएको छ भने स्वागतको तयारी तीव्र पारिएको छ।
न्युजिल्याण्डका प्रधानमन्त्री क्रिस्टोफर लक्सनले मोदीको भ्रमणलाई ऐतिहासिक भन्दै करिब ४० वर्षपछि कुनै भारतीय प्रधानमन्त्रीले न्युजिल्याण्ड भ्रमण गर्न लागेको बताएका छन्। भारत र न्युजिल्याण्डबीचको सम्बन्धलाई थप सुदृढ बनाउने उद्देश्यले हुन लागेको यो भ्रमणलाई दुवै देशका लागि महत्वपूर्ण मानिएको छ।
अकल्याण्डस्थित स्पार्क एरिनामा आयोजना हुने सामुदायिक कार्यक्रममा १० हजारभन्दा बढी भारतीय मूलका मानिस सहभागी हुने अपेक्षा गरिएको छ। आयोजकहरूका अनुसार कार्यक्रम भारत र न्युजिल्याण्डबीचको मित्रता, सांस्कृतिक सम्बन्ध तथा दुई देशका नागरिकबीचको आत्मीयतालाई झल्काउने अवसर हुनेछ।
अकल्याण्डका पूर्व मानार्थ भारतीय वाणिज्यदूत भव ढिल्लोनले मोदीको स्वागतका लागि न्युजिल्याण्डभरका भारतीय समुदाय उत्साहित रहेको बताए। उनका अनुसार ठूलो संख्यामा सहभागी हुने कार्यक्रमका लागि व्यापक तयारी भइरहेको छ र यो न्युजिल्याण्डमा बसोबास गर्ने भारतीय समुदायका लागि ऐतिहासिक क्षण हुनेछ।
मोदीको भ्रमणसँगै हालै सम्पन्न न्युजिल्याण्ड–भारत स्वतन्त्र व्यापार सम्झौता (एफटीए) पनि चर्चामा आएको छ। दुवै देशका सरकारले यस सम्झौताले व्यापार, लगानी, रोजगारी तथा आर्थिक सहकार्यलाई नयाँ उचाइमा पुर्याउने विश्वास व्यक्त गरेका छन्।
यो भ्रमण मोदीको न्युजिल्याण्डको पहिलो भ्रमण भने होइन। सन् २००१ मा भारतीय जनता पार्टी (भाजपा) का संगठनात्मक रणनीतिकारका रूपमा उनी न्युजिल्याण्ड आएका थिए। तर प्रधानमन्त्री बनेपछि भने यो उनको पहिलो भ्रमण हुनेछ।
भारत र न्युजिल्याण्डबीच सन् १९५८ मा कूटनीतिक सम्बन्ध स्थापना भएयता केही भारतीय शीर्ष नेताले मात्र न्युजिल्याण्ड भ्रमण गरेका छन्। सन् १९६८ मा इन्दिरा गान्धी र सन् १९८६ मा राजीव गान्धीले भ्रमण गरेका थिए। त्यसपछि पहिलोपटक भारतीय प्रधानमन्त्रीका रूपमा मोदी न्युजिल्याण्ड आउन लागेका हुन्।
मोदीको भ्रमणले दुई देशबीचको राजनीतिक, आर्थिक तथा जनस्तरको सम्बन्धलाई अझ सुदृढ बनाउने अपेक्षा गरिएको छ। विशेष गरी अकल्यान्डमा हुने सामुदायिक कार्यक्रमलाई भ्रमणको प्रमुख आकर्षणका रूपमा हेरिएको छ, जहाँ प्रधानमन्त्री मोदीले न्युजिल्याण्डमा बसोबास गर्ने १० हजारभन्दा बढी भारतीय समुदायलाई सम्बोधन गर्ने कार्यक्रम रहेको छ।
