वेलिङ्टन। न्युजिल्याण्डका नयाँ रक्षा मन्त्री क्रिस पेन्क ले अमेरिकासँगको रक्षा सम्बन्धमा कुनै पुनर्विचार नगर्ने स्पष्ट पारेका छन्। उनले इरानसँग सम्बन्धित युद्ध परिस्थितिले न्युजिल्याण्डको रक्षा नीतिमा परिवर्तन आवश्यक देखाएको छैन भन्ने बताएका छन्।
यसै साता RNZ सँगको अन्तर्वार्तामा मन्त्री पेन्कले भने, “मैले इरान युद्धका घटनाक्रममा त्यस्तो केही देखेको छैन जसले अमेरिकासँगको हाम्रो रक्षा सम्बन्ध पुनर्विचार गर्नुपर्ने अवस्था सिर्जना गरोस्।”
उनले न्युजिल्याण्डले सैन्य ड्रोन खरिद तथा विकासको गतिमा ढिलाइ गरिरहेको भन्ने आरोप पनि अस्वीकार गरेका छन्। अन्य देशहरूले तीव्र रूपमा—केही अवस्थामा ४०० प्रतिशतसम्म—ड्रोन क्षमतामा वृद्धि गरिरहेका बेला पनि न्युजिल्याण्ड सही दिशामा अघि बढिरहेको उनको दाबी छ। “मलाई लाग्छ, हामी सही मार्गमै छौँ,” उनले भने।
हालै मात्र रक्षा, अन्तरिक्ष तथा गुप्तचर एजेन्सीसम्बन्धी जिम्मेवारी सम्हालेका पेन्कले पूर्व मन्त्री जुडिथ कोलिन्स बाट उक्त जिम्मेवारी लिएका हुन्। नयाँ जिम्मेवारीबारे उनले “उत्साहजनक र चुनौतीपूर्ण” भएको प्रतिक्रिया दिएका छन्।
उनका अनुसार, आफूले पूर्ववर्ती नीतिबाट फरक दिशा लिने योजना नरहेको र हालको रणनीतिलाई निरन्तरता दिने संकेत दिएका छन्।
