विश्वको अग्लो शिखर सगरमाथामा मानव पाईला टेकिएको दिन मे २९ का दिन मनाइने एभरेष्ट डे यो वर्ष पनि न्युजिल्याण्डमा मनाइने भएको छ । न्युजिल्याण्डमा बिभिन्न शहरमा आउदो मे २८ , २९ र ३१ तारिकका दिन यो दिवस मनाउन लागिएको हो । सन् १९५३ मे २९ तारिकका दिन न्युजिल्याण्डका एडमण्ड हिलारी र नेपालका तेन्जिङ नोर्गे शेर्पाले विश्वको सर्वोच्च शिखर सगरमाथाको सफल आरोहण गरेका थिए ।
सोही दिनको सम्झनामा हरेक वर्ष न्युजिल्याण्डमा एभरेष्ट डे मनाउने गरिन्छ । यो वर्ष मे २८ का दिन न्युजिल्याण्डको साउथ आईल्याण्डमा रहेको ईभरकार्गिलमा एभरेष्ट डेको अवसरमा कार्यक्रम हुने भएको छ । त्यस्तै साउथ आईल्याण्ड कै Christchurch मा मे २९ का दिन कार्यक्रम गर्न लागिएको हो । सोही दिन नर्थ आईल्याण्डको अकल्याण्ड, ह्यामिल्टन र बे अफ प्लेन्टीको पापामोवाका बिशेष कार्यक्रम आयोजना गर्ने तयारी छ । उता राजधानी वेलिङ्टनमा भने ३१ तारिकका दिन एभरेष्ट डेको कार्यक्रम हुने छ । कार्यक्रमले न्युजिल्याण्ड र नेपाल बिचको सम्बन्धलाई थप उचाइमा लाने अपेक्षा गरिएको छ ।
