न्यूजिल्याण्ड सरकारले आगामी निर्वाचनअघि ईमिग्रेसन नीति थप कडा बनाउने संकेत दिएको छ । साथै, किवीसेभर योजनामा पनि परिवर्तन ल्याउने तयारी भइरहेको प्रधानमन्त्री क्रिस्टोफर लक्सनले बताएका छन् ।
अकल्याण्डमा आयोजित बजेटपूर्व कार्यक्रममा बोल्दै लक्सनले सामाजिक स्थायित्वलाई प्राथमिकतामा राखेर अध्यागमन नीति निर्माण गरिने बताएका हुन् । उनले युरोप र उत्तर अमेरिकामा लागू भएका “असफल” अध्यागमन नीतिका कारण सामाजिक विभाजन बढेको उल्लेख गर्दै न्यूजिल्याण्डमा पनि यस विषयमा सावधानी अपनाउनुपर्ने बताए ।
प्रधानमन्त्री लक्सनले व्यवसायी समुदायलाई सम्बोधन गर्दै सामाजिक स्थायित्व र व्यापारिक नाफाबीच छनोट गर्नुपरे सामाजिक स्थायित्वलाई प्राथमिकता दिने स्पष्ट पारे ।
उनका अनुसार सरकारले दक्ष कामदारलाई प्राथमिकता दिने, अंग्रेजी भाषा मापदण्ड कडा बनाउने तथा नियम उल्लंघनमा थप कडाइ गर्ने तयारी गरिरहेको छ ।
यसैबीच, नेसनल पार्टीले किवीसेभर योजनामा पनि सुधारको तयारी गरेको जनाएको छ । प्रधानमन्त्री लक्सनले सेवानिवृत्ति आयुक्त र विभिन्न विश्लेषकहरूले सुझाएका सुधार प्रस्तावहरूबारे अध्ययन भइरहेको र छिट्टै थप नीति सार्वजनिक गरिने बताए ।
यसअघि नेशनल पार्टीले पुनः सरकारमा आए रोजगारदाताले किवीसेभरमा गर्ने न्यूनतम योगदान दर बढाउने घोषणा गरिसकेको छ ।
