अन्तर्राष्ट्रिय विद्यार्थीका लागि न्युजिल्याण्डले ल्यायो नयाँ भिसा व्यवस्था

न्युजिल्याण्ड अध्यागमन (इमिग्रेसन न्युजिल्याण्ड–आईएनजेड) ले अन्तर्राष्ट्रिय विद्यार्थी तथा स्नातकहरूका लागि महत्वपूर्ण परिवर्तनहरूको घोषणा गरेको छ। नयाँ व्यवस्था आगामी १६ नोभेम्बर २०२६ देखि लागू हुने जनाइएको छ।

स्नातकहरूका लागि नयाँ कार्य भिसा

आईएनजेडले योग्य अन्तर्राष्ट्रिय स्नातकहरूका लागि ६ महिनाको छोटो अवधिको स्नातक कार्य भिसा (Short-term Graduate Work Visa – SGWV) सुरु गर्ने भएको छ। यो भिसा न्युजिल्याण्ड योग्यता तथा प्रमाणपत्र ढाँचा (NZQCF) को लेभल ५ देखि ७ सम्म अध्ययन गरेका तर पोस्ट स्टडी वर्क भिसा (PSWV) का लागि योग्य नभएका विद्यार्थीहरूलाई उपलब्ध हुनेछ।

यस भिसाका लागि विद्यार्थीले न्युजिल्याण्डमा कम्तीमा २४ हप्ता पूर्णकालीन अध्ययन गरेको हुनुपर्नेछ। यद्यपि अंग्रेजी भाषा, फाउन्डेसन तथा ब्रिजिङ सम्बन्धी योग्यताहरू यस योजनामा समावेश गरिएका छैनन्।

पोस्ट स्टडी वर्क भिसाको दायरा विस्तार

नयाँ व्यवस्थाअनुसार स्नातक डिप्लोमा (Graduate Diploma) पूरा गरेका विद्यार्थीहरू, यदि उनीहरूसँग स्नातक तह (Bachelor’s Degree) को योग्यता छ भने, पोस्ट स्टडी वर्क भिसाका लागि पनि योग्य हुनेछन्। उक्त स्नातक डिग्री न्युजिल्याण्ड बाहिरबाट प्राप्त गरिएको भए पनि मान्य हुनेछ।

पोस्ट स्टडी वर्क भिसाको अवधि विद्यार्थीले न्युजिल्याण्डमा स्नातक डिप्लोमा अध्ययन गरेको समयावधिका आधारमा निर्धारण गरिनेछ, तर अधिकतम एक वर्षसम्म मात्र प्रदान गरिनेछ। विद्यार्थीले आफ्नो सम्पूर्ण स्नातक डिप्लोमा कार्यक्रम न्युजिल्याण्डमै अध्ययन गरेको हुनुपर्नेछ। पूर्व मान्यता प्राप्त सिकाइ (Recognised Prior Learning), क्रस-क्रेडिटिङ वा यस्तै अन्य माध्यमबाट प्राप्त क्रेडिटहरूलाई गणना गरिने छैन।

आवेदन समयसीमा

यी दुवै प्रकारका कार्य भिसाका लागि सम्बन्धित विद्यार्थी भिसाको म्याद समाप्त भएको तीन महिनाभित्र मात्र आवेदन दिन सकिनेछ।

विद्यार्थी भिसा रद्द गर्ने प्रक्रियामा परिवर्तन

आईएनजेडले विदेशमा रहेका विद्यार्थी भिसा धारकहरूको नामांकन (Enrolment) शैक्षिक संस्थाबाट रद्द भएको अवस्थामा अपनाइने प्रक्रियामा पनि परिवर्तन गरेको छ।

अबदेखि विद्यार्थी विदेशमा रहेको अवस्थामा र उसको नामांकन रद्द भएको पुष्टि भएपछि, भिसा रद्द गर्नुअघि ‘Potentially Prejudicial Information’ पत्र पठाइने छैन।

आईएनजेडका अनुसार शैक्षिक संस्थाले नामांकन रद्द भएको पुष्टि गरेपछि भिसा रद्द गर्ने निर्णय लिन पर्याप्त आधार प्राप्त हुने भएकाले सो निर्णयबारे सम्बन्धित व्यक्तिलाई प्रत्यक्ष रूपमा जानकारी गराइनेछ।