न्युजिल्याण्डवासीको अन्तर्राष्ट्रिय दृष्टिकोणमा उल्लेखनीय परिवर्तन देखिएको छ। नयाँ सर्वेक्षणअनुसार एक दशकयताकै पहिलोपटक न्युजिल्याण्डका नागरिकहरूले अमेरिकाभन्दा चीनलाई बढी मित्र राष्ट्रका रूपमा हेर्न थालेका छन्।
बुधबार सार्वजनिक गरिएको एशिया न्युजिल्याण्ड फाउन्डेसनको वार्षिक Perceptions of Asia and Asian Peoples 2026 प्रतिवेदनले चीनप्रतिको धारणा सकारात्मक बन्दै गएको देखाएको छ। सर्वेक्षणअनुसार चीनलाई न्युजिल्याण्डको मित्र मान्नेहरूको संख्या गत वर्षको ३८ प्रतिशतबाट बढेर ४३ प्रतिशत पुगेको छ। यता अमेरिकालाई मित्र राष्ट्रका रूपमा हेर्नेहरूको अनुपात भने ६१ प्रतिशतबाट घटेर ३९ प्रतिशतमा झरेको छ।
प्रतिवेदनले विश्व राजनीतिक परिस्थितिमा आएको परिवर्तनले न्युजिल्याण्डवासीको सोचमा प्रभाव पारेको संकेत गरेको छ। वेलिङ्टनस्थित भिक्टोरिया विश्वविद्यालयका अन्तर्राष्ट्रिय सम्बन्धका प्राध्यापक डेभिड केपीका अनुसार सर्वेक्षण भएको अवधिमा अमेरिकाको विदेश नीतिलाई लिएर उठेका विवाद र विश्व राजनीतिमा देखिएको अनिश्चितताले जनधारणामा असर पारेको हुन सक्छ।
यद्यपि चीनप्रतिको सकारात्मक धारणा बढे पनि एशियामा न्युजिल्याण्डको सबैभन्दा नजिकको मित्र राष्ट्र भने जापान नै रहेको छ। सन् २०१७ देखि लगातार जापानले यो स्थान कायम राख्दै आएको छ। जापानपछि सिङ्गापुर, फिलिपिन्स र दक्षिण कोरियालाई न्युजिल्याण्डका निकट मित्र राष्ट्रका रूपमा हेरिएको छ।
प्रतिवेदनले न्युजिल्याण्डको भविष्यका लागि एशियासँगको सम्बन्ध अझ महत्वपूर्ण बन्दै गएको पनि देखाएको छ। ८१ प्रतिशत उत्तरदाताले एशियाली देश र जनतासँगको सम्बन्ध विकास गर्नु आवश्यक रहेको बताएका छन्। उत्तर एशिया सबैभन्दा महत्वपूर्ण क्षेत्रका रूपमा रहे पनि दक्षिण एशिया—विशेषगरी भारत, पाकिस्तान र नेपालप्रतिको चासो पनि बढ्दै गएको पाइएको छ।
खाना, संस्कृति, मनोरञ्जन र पर्यटनमार्फत एशियासँगको सम्बन्ध झन् बलियो बन्दै गएको प्रतिवेदनमा उल्लेख छ। गत वर्ष एशिया अष्ट्रेलिया र प्रशान्त क्षेत्रबाहेक न्युजिल्याण्डवासीले सबैभन्दा धेरै भ्रमण गरेको क्षेत्र बनेको थियो। चीन, भारत, इन्डोनेसिया र जापान प्रमुख गन्तव्यका रूपमा रहेका छन्।
यस्तै, एशियाबाट न्युजिल्याण्डमा हुने आप्रवासनलाई सकारात्मक रूपमा हेर्नेहरूको संख्या पनि विगत दशकको तुलनामा उल्लेख्य रूपमा बढेको छ। सर्वेक्षणमा सहभागी आधाभन्दा बढीले एशियाली आप्रवासनले देशलाई सकारात्मक योगदान पुर्याएको बताएका छन्।
विश्लेषकहरूका अनुसार यो परिवर्तन केवल व्यापार वा कूटनीतिक सम्बन्धमा सीमित छैन। एशिया अब न्युजिल्याण्डको दैनिक जीवन, संस्कृति, शिक्षा, पर्यटन र आर्थिक गतिविधिसँग प्रत्यक्ष रूपमा जोडिएको क्षेत्र बनिसकेको छ। यही कारण न्युजिल्याण्डवासीको दृष्टिकोण क्रमशः एशियातर्फ केन्द्रित हुँदै गएको देखिएको छ।
२१ जनवरीदेखि १८ फेब्रुअरी २०२६ सम्म सञ्चालन गरिएको उक्त सर्वेक्षणमा १५ वर्ष वा सोभन्दा माथिका २,३०० न्युजिल्याण्डवासी सहभागी भएका थिए।
