न्युजिल्याण्ड र भारतबीच हालै सम्पन्न स्वतन्त्र व्यापार सम्झौतापछि एयर न्युजिल्याण्डले भारतका लागि सिधा उडान सञ्चालन गर्ने सम्भावनाको अध्ययन सुरु गरेको छ।
जुन २०२६ मा आयोजित एक अन्तर्राष्ट्रिय हवाई सेवा सम्मेलनमा एयर न्युजिल्याण्डका प्रमुख कार्यकारी अधिकृत निखिल रविशंकर ले भारत–न्युजिल्याण्ड सिधा उडानको सम्भाव्यता मूल्याङ्कन भइरहेको जानकारी दिएका हुन्।
एयर न्युजिल्याण्डले एयर इन्डिया र सिङ्गापुर एयरलाइन्स सँग सहकार्य गर्दै प्रत्यक्ष उडान सेवा व्यावसायिक रूपमा सम्भव हुने वा नहुने विषयमा अध्ययन गरिरहेको जनाएको छ। यसअघि यी एयरलाइन्सहरूबीच अष्ट्रेलिया र सिङ्गापुरमार्फत १६ वटा जोडिएका उडान मार्ग साझा गर्ने सहमति भएको थियो।
न्युजिल्याण्डमा भारतीय समुदाय तीव्र रूपमा बढ्दै गएको छ। हाल भारतीय मूलका नागरिकहरू न्युजिल्याण्डको तेस्रो ठूलो जातीय समुदायका रूपमा स्थापित भइसकेका छन्। यसले भारत–न्युजिल्याण्डबीचको हवाई यात्राको माग उल्लेखनीय रूपमा बढाएको बताइएको छ।
एयरलाइन्स कम्पनीहरूका अनुसार आवश्यक नियामक स्वीकृति प्राप्त भएमा र नयाँ ठूला वाइडबडी यात्रुवाहक विमानहरू समयमै उपलब्ध भएमा सन् २०२८ को अन्त्यसम्ममा सिधा उडान सेवा सुरु गर्ने लक्ष्य राखिएको छ।
प्रस्तावित प्रत्यक्ष उडानले अकल्याण्डलाई भारतका प्रमुख शहरहरूसँग जोड्नेछ। यसबाट यात्रुहरूले अष्ट्रेलिया, सिङ्गापुर वा अन्य देशमा ट्रान्जिट गर्नुपर्ने झन्झटबाट मुक्ति पाउनेछन् भने कुल यात्रा समय पनि उल्लेखनीय रूपमा घट्ने अपेक्षा गरिएको छ।
न्युजिल्याण्डमा बसोबास गर्ने हजारौँ नेपाली, भारतीय तथा दक्षिण एसियाली समुदायका लागि समेत यो सेवा निकै महत्वपूर्ण बन्न सक्ने विश्वास गरिएको छ। भारत हुँदै नेपाल आवतजावत गर्ने यात्रुहरूले पनि सिधा उडानबाट लाभ लिन सक्ने सम्भावना रहेको छ।
