न्युजिल्याण्डको सत्तारुढ नेशनल पार्टीले पुनः सरकारमा फर्किए जुलाई २०२८ देखि देशका सबै कामदारका लागि KiwiSaver वा समान प्रकारको अवकाश बचत योजना अनिवार्य बनाउने महत्वाकांक्षी नीति सार्वजनिक गरेको छ।
लोअर हटमा आयोजित नेशनल पार्टीको वार्षिक सम्मेलनमा प्रधानमन्त्री तथा पार्टी नेता क्रिस्टोफर लक्सनले उक्त घोषणा गर्दै न्युजिल्याण्डवासीको भविष्य सुरक्षित गर्न थप कदम चाल्न आवश्यक रहेको बताएका छन्।
नयाँ नीतिअनुसार जुलाई २०२८ देखि रोजगारीमा रहेका सबै व्यक्तिले KiwiSaver वा समकक्षी अवकाश बचत योजनामा योगदान गर्नुपर्नेछ। यसअघि KiwiSaver स्वेच्छिक सहभागितामा आधारित रहेको थियो।
नेशनल पार्टीले यसअघि नै कर्मचारी र रोजगारदाताको KiwiSaver योगदान दर क्रमशः बढाएर अष्ट्रेलियाको स्तरसँग मिलाउने प्रतिबद्धता जनाएको थियो। नयाँ योजनाअनुसार सन् २०३२ सम्ममा कर्मचारी र रोजगारदाता दुवैले ६–६ प्रतिशत योगदान गर्नेछन्, जसले कुल योगदान दर १२ प्रतिशत पुग्नेछ।
पार्टीले नवजात शिशुका लागि पनि नयाँ सुविधा घोषणा गरेको छ। जुलाई २०२७ पछि जन्मिने प्रत्येक बच्चाका लागि सरकारले १,५०० डलरको प्रारम्भिक KiwiSaver योगदान गर्नेछ र उनीहरू स्वतः KiwiSaver मा दर्ता हुनेछन्।
त्यस्तै, सशुल्क अभिभावक बिदा (Paid Parental Leave) मा रहेका अभिभावकहरूका लागि सरकारले अतिरिक्त KiwiSaver योगदान उपलब्ध गराउने प्रस्ताव पनि सार्वजनिक गरिएको छ। साथै ६५ वर्षभन्दा माथिका कर्मचारीहरूका लागि रोजगारदाताले KiwiSaver योगदान जारी राख्नुपर्ने व्यवस्था गरिनेछ।
प्रधानमन्त्री लक्सनले हालको KiwiSaver प्रणाली अधिकांश नागरिकका लागि सफल भए पनि कम आय भएका व्यक्ति, स्वरोजगारमा रहेका नागरिक तथा युवाहरू अझै पर्याप्त रूपमा बचतमा सहभागी हुन नसकेको बताए।
“भविष्यका लागि बचत सुरु गर्ने सबैभन्दा राम्रो समय युवावस्थामै हो। त्यसबेला बचत गरिएको प्रत्येक डलरले लामो समयसम्म वृद्धि हुने अवसर पाउँछ,” उनले भने।
उनले अहिलेको महँगी र आर्थिक दबाबका कारण बचत गर्न गाह्रो भए पनि अवकाशपछिको जीवनका लागि आर्थिक सुरक्षा अझ महत्वपूर्ण रहेको उल्लेख गरे।
नेशनल पार्टीको यो प्रस्ताव आगामी निर्वाचनको प्रमुख आर्थिक तथा सामाजिक नीतिमध्ये एक बन्ने अपेक्षा गरिएको छ। विश्लेषकहरूका अनुसार पार्टीले KiwiSaver सुधारसँगै न्युजिल्याण्ड सुपरएन्युएसन (पेन्सन) सम्बन्धी थप परिवर्तनहरू पनि आगामी महिनाहरूमा सार्वजनिक गर्न सक्ने संकेत देखिएको छ।
यदि यो नीति लागू भयो भने न्युजिल्याण्डको अवकाश बचत प्रणालीमा हालसम्मकै ठूलो परिवर्तन हुने र लाखौँ कामदारहरू प्रत्यक्ष रूपमा प्रभावित हुने अपेक्षा गरिएको छ।
