49
Shares
न्युजिल्याण्डको ५४औँ संसद्ले बुधबार आफ्नो अन्तिम बैठक सम्पन्न गरेको छ। आगामी नोभेम्बर ७ मा हुने आमनिर्वाचन अघि भएको अन्तिम संसदीय बहसमा प्रधानमन्त्री क्रिस्टोफर लक्सन र विपक्षी दल लेबरका नेता क्रिस हिप्किन्सले आ–आफ्नो सरकार तथा दलको पक्ष प्रस्तुत गर्दै मतदातासमक्ष आफ्ना प्राथमिकता राखेका छन्। न्युजिल्याण्ड संसद्का अनुसार २३ सेप्टेम्बरको बैठक नै ५४औँ संसद्को अन्तिम बसाइ थियो।
प्रधानमन्त्री क्रिस्टोफर लक्सनले आफ्नो नेतृत्वमा रहेको केन्द्र–दक्षिणपन्थी गठबन्धन सरकारको तीन वर्षे कार्यकालमा भएका कामको बचाउ गर्दै आफूले हासिल भएका उपलब्धिप्रति गर्व रहेको बताएका छन्। उनले आर्थिक वृद्धि, रेकर्ड निर्यात तथा सरकारी ऋण घटाउने कामलाई सरकारका प्रमुख उपलब्धिका रूपमा प्रस्तुत गरे।
लक्सनले आगामी निर्वाचनमा आफ्नो सरकारलाई दोस्रो कार्यकालका लागि अवसर दिनुपर्ने धारणा राख्दै न्युजिल्याण्डमा अझै ठूलो आर्थिक सम्भावना रहेको बताएका छन्।
यसको जवाफमा विपक्षी लेबर पार्टीका नेता क्रिस हिप्किन्सले सरकार आफ्ना प्रमुख चुनावी प्रतिबद्धता पूरा गर्न असफल भएको आरोप लगाए। उनका अनुसार सरकारले जीवनयापनको बढ्दो लागत कम गर्ने वाचा गरे पनि धेरै न्युजिल्याण्डवासीले अझै आर्थिक दबाब सामना गरिरहेका छन्।
हिप्किन्सले सरकारको प्राथमिकता गलत रहेको र तीन वर्षको कार्यकालमा जनताको दैनिक जीवनसँग सम्बन्धित समस्यामा अपेक्षित सुधार आउन नसकेको दाबी गरे।
आगामी निर्वाचनमा जीवनयापनको लागत, आर्थिक व्यवस्थापन र सार्वजनिक सेवाहरू प्रमुख चुनावी मुद्दा बन्ने अपेक्षा गरिएको छ। लक्सन नेतृत्वको नेसनल पार्टीले ACT New Zealand र New Zealand First सँगको गठबन्धनमार्फत सरकार कायम राख्ने प्रयास गर्नेछ भने लेबरसहितका विपक्षी दलहरूले सरकार परिवर्तनका लागि मतदातासमक्ष आफ्नो पक्ष राखिरहेका छन्।
संसद्को अन्तिम बैठक सकिए पनि ५४औँ संसद् अक्टोबर १ मा औपचारिक रूपमा विघटन हुनेछ। संसद्को आधिकारिक समयरेखाअनुसार यही दिनबाट निर्वाचनतर्फको औपचारिक प्रक्रिया अघि बढ्नेछ। त्यसपछि नोभेम्बर ७ मा आमनिर्वाचन हुनेछ।
५४औँ संसद्को कार्यकालमा २४० भन्दा बढी विधेयक अघि बढाइएका थिए भने २३० वटा कानुन पारित भएको बताइएको छ। संसद्को आधिकारिक अभिलेखले यस अवधिमा अघि बढाइएका विधेयकहरूको विवरण पनि सार्वजनिक गरेको छ।
