ट्रकको टायर पड्किदा भयो अकल्याण्डमा दुर्घटना, मृत्‍यु हुने तीनै जना समोवाका नागरिक

अकल्याण्डको रामारामामा सोमबार भएको सवारी दुर्घटनामा परि मृत्‍यु भएका ३ जना समोवाका नागरिक भएको प्रहरीले जनाएको छ । ट्रकको टायर पड्केर ट्रक एक्कासी अनियन्त्रित हुँदा अन्य ३ सवारी साधन दुर्घटनाको चपेटामा परेको थियो । मृत्‍यु हुनेहरु तीनै जना केही महिना अगाडि सिजनल वर्क भिसा अन्तर्गत न्युजिल्याण्ड आएका थिए । किवी क्षेत्रमा मेन सिजन सकाएर उनिहरु यसै साता समोवा फर्किदै थिए । अकल्याण्ड हुँदै समोवा जान उनिहरु बे अफ प्लेन्टीबाट अकल्याण्ड जादै गरेको प्रहरीले जानकारी दिएको छ । प्रहरीका अनुसार टायर पड्किएर ट्रकले अनियन्त्रित हुँदै एउटा भ्यान र दुई वटा कारलाई ठक्कर दिएको थियो । सुरुमै भ्यानलाई ठक्कर दिएकाले भ्यानमा बढी क्षति पुगेको प्रहरीले बताएको छ । भ्यानमा ६ जना सवार रहेको र ति मध्ये ३ जनाको मृत्‍यु भएको हो । मृत्‍यु हुनेमा ३२ , ३७ र ४७ वर्षका पुरुष रहेका छन् । अन्य ३ जना घाईतेको उपचार भईरहेको जसमध्य एक जनाको अवस्था गम्भिर रहेको बताईएको छ ।