न्यूजील्याण्डका प्रधानमन्त्री क्रिस्टोफर लक्सन बुधबार बिहान आफ्नो पहिलो औपचारिक चीन भ्रमणका लागि शंघाईमा अवतरण गरेका छन्। प्रधानमन्त्री लक्सन चढेको रोयल न्यूजील्याण्ड एयर फोर्सको बोइङ ७५७ विमान अकल्याण्डको एयरबेसबाट प्रस्थान गरेपछि करिब २० घण्टाको यात्रापछि न्यूजील्याण्ड समय अनुसार बिहान ३:३० बजे शंघाई पुगेको हो।
लक्सनले शंघाईमा दुई दिन बिताउने छन्, जहाँ उनले न्यूजील्याण्डका उत्पादनहरू प्रचार गर्नेछन् भने तेस्रो दिन बेइजिङमा चिनियाँ उच्चस्तरीय बैठकमा सहभागी हुने कार्यक्रम छ।
प्रधानमन्त्रीसँगै भ्रमणमा पर्यटन मन्त्री लुइज अप्सटन, जातीय समुदाय मन्त्री मार्क मिचेल, अधिकारीहरूको टोली र व्यापारी प्रतिनिधिहरू पनि सहभागी छन्।
प्रधानमन्त्रीको यो भ्रमणलाई व्यापारिक सहकार्य र रणनीतिक सम्बन्ध अझ मजबुत बनाउने अवसरका रूपमा हेरिएको छ। विश्लेषकहरूका अनुसार यो भ्रमणले दुई देशबीचको सम्बन्ध पुनः जीवन्त पार्नेभन्दा पनि सुदृढ पार्ने उद्देश्य राखेको छ।
प्रधानमन्त्री लक्सन शनिबार बेल्जियम प्रस्थान गर्ने कार्यक्रम रहेको जनाइएको छ।
