न्यूजील्याण्डमा मातारिकी पर्व उल्लासपूर्वक मनाइँदैछ। यो अवसरमा बेलायती राजा चार्ल्सले न्यूजील्याण्डवासीहरूलाई समर्पित विशेष सन्देश पठाएका छन्।
“ए मिहि आना कि आ मातारिकी मा पूआंगा,” अर्थात् “मातारिकीलाई सम्मान,” भन्दै आफ्नो सन्देश सुरु गरेका राजाले भने, “म र मेरी पत्नी न्यूजील्याण्डमा मातारिकी अर्थात् माओरी नयाँ वर्ष मनाउने सम्पूर्णलाई हार्दिक शुभकामना दिन्छौं।”
यस वर्ष विशेषगरी ती इवी (माओरी जातीय समुदाय) र क्षेत्रहरूलाई राजाले स्मरण गरे, जसले नयाँ वर्षको सुरुवात पूआंगा तारा (Rigel) को उदयसँग गर्छन्।
राजा चार्ल्सले भने, “पूर्वी क्षितिजमा मातारिकीको उदयले विगतलाई स्मरण गर्ने, हराएका प्रियजनलाई सम्झने र उज्यालो भविष्यको तयारी गर्ने समयको संकेत गर्दछ।”
साथै उनले यो पर्वले विभिन्न समुदाय र मानिसहरूलाई एउटै आकाशमुनि एकताबद्ध भई उत्सव मनाउने अवसर दिने उल्लेख गरे।
