ग्रीन पार्टीले आगामी सरकारको नेतृत्व गर्ने आफ्नो इच्छा व्यक्त गरेको छ । वेलिङटनमा यस साता सम्पन्न वार्षिक साधारणसभा (AGM) मा ग्रीन पार्टीका सह-अध्यक्षहरूले आगामी सरकारको नेतृत्व गर्ने आफ्नो आकांक्षा सार्वजनिक गरेका छन्। पार्टीका सह-अध्यक्ष मरामा डेभिडसन र क्लोए स्वारब्रिकले सदस्यहरूलाई ठुलो राजनीतिक रूपान्तरणको लागि एकजुट भएर अगाडि बढ्न आह्वान गरे।
त्यसैगरी, स्वारब्रिकले पनि राजनीतिक र सामाजिक रूपान्तरणको लागि तत्काल कदम चाल्नुपर्ने बताउँदै, ग्रीन पार्टीको नेतृत्वमा नयाँ पुस्ताले फरक पार्ने क्षमता भएको दाबी गरिन्। उनले सदस्यहरूलाई “अवसर पर्खेर होइन, सिर्जना गरेर” अगाडि बढ्न आग्रह गरिन्।
लेबर पार्टीका नेता क्रिस हिप्किन्सले आइतवार बिहान उक्त विषयमा प्रतिक्रिया दिँदै आफू “ग्रीन पार्टीसँग वादविवाद गर्नुभन्दा सरकार के गरिरहेको छ भन्नेमा बढी चासो राख्ने” बताए।
उनले भने, “उनीहरूले त आएर ‘हामी लेबरको सानो संस्करण मात्र हौं’ भन्ने त होइन नि, हैन? मेरो मतलब, उनीहरू आफैंलाई अलग देखाउन चाहन्छन्। चुनावी अभियानमा राजनीतिक दलहरूले यही गर्छन्।”
“तर मेरो विचारमा हामीलाई केही नयाँ सोच आवश्यक छ। हामीले अघिल्लो पटक सरकारमा हुँदा लेबर र ग्रीनले गरेका कुरा मात्र फेरि तताएर प्रयोग गर्न सक्दैनौं। हामीसँग साँच्चै नयाँ विचारहरू हुनुपर्छ।”
पार्टीको वार्षिक सभामा उपस्थित नेताहरू र कार्यकर्ताहरूले पनि वातावरण संरक्षण, सामाजिक न्याय र आदिवासी अधिकारलाई केन्द्रमा राखेर आगामी चुनावी अभियान सञ्चालन गर्ने प्रतिबद्धता जनाएका छन्।
