आप्रवासन मन्त्री एरिका स्ट्यानफोर्डले नयाँ नियम ल्याउँदैछिन्, जसअनुसार New Zealand मा २० वर्षदेखि बसिरहेका भए पनि गम्भीर अपराध गर्नेहरूलाई सजिलै डिपोर्ट गर्न सकिनेछ।
यो नियम आप्रवासन प्रणाली सुधारको हिस्सा हो। यसअघि उनले कम-कुशल कामका लागि अंग्रेजी भाषा अनिवार्य गरेकी थिइन् र रोजगार भिसाका लागि न्यूनतम सीप र अनुभवको स्तर तोकेकी थिइन्। साथै, कम-कुशल कामका लागि बसाइँ अवधि पाँच वर्षबाट घटाएर तीन वर्षमा सीमित गरिएको थियो।
स्ट्यानफोर्डले अब Immigration (Enhanced Risk Management) Amendment Bill ल्याउने तयारी गरेकी छिन्। यसले डिपोर्ट सम्बन्धी नियमलाई अझै कडा र स्पष्ट बनाउनेछ। यो विधेयक वर्षको अन्त्यतिर प्रस्तुत गरिने अपेक्षा छ।
नयाँ नियम अनुसार:
-
हत्या, मानवहत्या वा यौन हिंसाजस्ता गम्भीर अपराध गर्ने बसोबास भिसा भएका व्यक्तिलाई १० वर्ष नाघेपछि पनि डिपोर्ट गर्न सकिनेछ।
-
झूटो वा भ्रामक जानकारी दिएको, देश आउनुअघि अपराध गरेको वा त्रुटिपूर्ण भिसा पाएको अवस्थामा पनि डिपोर्ट गर्न सकिनेछ।
-
ठेगाना नपाइएमा डिपोर्ट नोटिस अनलाइन पठाउन सकिनेछ।
-
आप्रवासन अधिकृतलाई पहिचानसम्बन्धी जानकारी माग्ने अधिकार अझ बढाइनेछ।
-
आप्रवासी शोषणको सजाय सात वर्षको जेलबाट बढाएर १० वर्षसम्म गरिनेछ।
स्ट्यानफोर्डका अनुसार, “धेरैजसो आप्रवासीले नियम पालना गर्छन्। तर जसले गर्दैनन्, उनीहरूलाई नियन्त्रण गर्न ठोस कानुनी आधार आवश्यक छ।”
