364
Shares
क्रिसमस बिदा नजिकिँदै गर्दा न्यूजील्याण्डभर मौसम बिग्रिने संकेत देखिएको छ। देशभर भारी वर्षा, तीव्र हावा र अचानक चिसो मौसमको प्रभाव पर्ने पूर्वानुमान गरिएको छ।
साउथ आईल्याण्डबाट सक्रिय चिसो फ्रन्ट हिजोदेखि अघि बढ्न थालेको र आज ढिलो बिहानतिर नर्थ आईल्याण्डतर्फ प्रवेश गर्ने अनुमान गरिएको छ। मौसम विभाग मेटसर्भिसका अनुसार आगामी केही दिन दुवै आईल्याण्डमा गर्मी असर पार्ने गरी खराब मौसम देखिनेछ।
हिजो साउथ आईल्याण्डमा खराब मौसमको मुख्य प्रभाव देखिएको थियो र आज पनि विशेषगरी पश्चिमी क्षेत्रहरूमा यसको असर कायमै रहने अपेक्षा गरिएको छ। चिसो फ्रन्टपछि साउथ आईल्याण्डका धेरै स्थानमा आज गर्जनसहितको वर्षा र असिनापानीको जोखिम रहने मेटसर्भिसले जनाएको छ।
मेटसर्भिसका अनुसार यो फ्रन्ट ढिलो बिहानदेखि नर्थ आईल्याण्डमा सर्नेछ, जसका कारण खुला पश्चिमी क्षेत्रहरूमा शक्तिशाली उत्तर–पश्चिमी हावा चल्नेछ भने धेरै स्थानमा साँझसम्म वर्षा हुनेछ।
मेटसर्भिसकी मौसमविद् जुलियाने बर्गडोल्टले वेलिङ्टनजस्ता स्थानमा मध्याह्नअघि नै वर्षा सुरु हुने जानकारी दिइन्। उनका अनुसार नर्थ आईल्याण्ड मा भारी वर्षा भने क्रमशः हट्नेछ, तर भोलिसम्म छिटफुट पानी पर्ने क्रम जारी रहनेछ।
