नेपालदेखि विश्वमञ्चसम्म व्यापक लोकप्रियता कमाएको नेपाली चर्चित ब्याण्ड नेपथ्य छिट्टै फेरि न्यूजील्याण्डमा कन्सर्टका लागि फर्किँदै छ। करिब ९ वर्षपछि अकल्याण्डमा आयोजना हुन लागेको यस कन्सर्टलाई लिएर यहाँ रहेका नेपाली समुदायमा विशेष उत्साह देखिएको छ।
नेपथ्यको कन्सर्ट नेपालमा मात्र होइन, अमेरिका, अष्ट्रेलिया, युरोप र मध्यपूर्वलगायत विश्वभर रहेका नेपाली समुदायबीच अत्यन्त लोकप्रिय रहँदै आएको छ। जहाँ–जहाँ नेपथ्यले प्रस्तुति दिएको छ, त्यहाँ ठूलो संख्यामा दर्शकको सहभागिता र धेरैजसो अवस्थामा टिकट समयअघि नै बिक्री हुने गरेको इतिहास छ।
विदेशमा रहेका नेपालीका लागि नेपथ्यको कन्सर्ट संगीतभन्दा पनि आफ्नोपन, स्मृति र सांस्कृतिक पहिचानसँग जोडिने अवसर मानिन्छ। यही कारण अकल्याण्डमा हुने आगामी कन्सर्टमा पनि उल्लेख्य दर्शक उपस्थिति रहने अपेक्षा गरिएको छ।
नेपथ्यको गीतले प्रवासी नेपालीलाई आफ्नोपन, गाउँ–घर र मातृभूमिसँग जोड्छ। अमृत गुरुङको शक्तिशाली आवाज र मौलिक लोक–रक फ्युजनले दर्शकलाई उभिएर गाउन बाध्य बनाउँछ।
नेपथ्यका गीत नसुन्ने सायद नै कोही नेपाली होलान्। ‘रेशमदेखि भेडाको ऊन जस्तो’, ‘जोमसोमै बजारमा’, ‘तालको पानी’, ‘उडायो रेलैले’, ‘जोगाले हुन्छ भेट’, ‘छेक्यो छेक्यो’, ‘चरी मर्यो सिसैको गोलीले’, ‘यानी माया’, ‘यो जिन्दगानी’ जस्ता गीतहरू नेपाली जनजीवनसँग गहिरोसँग गाँसिएका छन्।
यी गीतहरू केवल सुन्ने मात्रै होइन, हरेक नेपालीको मुखमा झुण्डिएको, मनमा बसेको र भावनामा बगेको संगीत बनेका छन्। गाउँदेखि सहरसम्म, देशभित्रदेखि विदेशसम्म जहाँ नेपाली छन्, त्यहाँ नेपथ्यका गीतहरू गुन्जिने गरेका छन्।
यिनै कालजयी गीतहरूमा झुम्नका लागि अकल्याण्डमा हुन लागेको नेपथ्यको कन्सर्टमा नेपाली समुदायको उल्लेखनीय उपस्थिति रहने अपेक्षा गरिएको छ। लामो समयपछि प्रत्यक्ष रूपमा यी लोकप्रिय गीतहरू सुन्न र गाउन पाउने अवसर भएकाले यस कन्सर्टलाई धेरैले छुटाउनै नहुने र जीवनभर नबिर्सिने क्षणका रूपमा लिएका छन्।
यसअघि नेपथ्यले सन् २०१७ को जुलाईमा अकल्याण्डमा प्रस्तुति दिएको थियो, जसले ठूलो दर्शक सहभागिता र सकारात्मक प्रतिक्रिया पाएको थियो। लामो अन्तरालपछि पुनः कन्सर्ट हुन लागेकाले यसपटकको कार्यक्रमलाई अझै विशेष रूपमा हेरिएको छ।
लाखे इभेन्ट्सको आयोजनामा हुन लागेको यस कन्सर्टको मिति, स्थान र टिकटसम्बन्धी विस्तृत जानकारी भने हालसम्म सार्वजनिक गरिएको छैन। आयोजकका अनुसार आवश्यक तयारी पूरा भएपछि थप विवरण सार्वजनिक गरिनेछ।
नेपथ्यको निरन्तर लोकप्रियता, सशक्त लाइभ प्रस्तुति र मौलिक नेपाली संगीतले न्यूजील्याण्डको कन्सर्टलाई पनि अत्यन्त सफल बनाउने अपेक्षा गर्न सकिन्छ।
