247
Shares
चुनावी वर्षको पहिलो State of the Nation सम्बोधनमा प्रधानमन्त्री क्रिस्टोफर लक्सनले आम निर्वाचनको मिति घोषणा गर्ने अपेक्षा गरिएको भए पनि सम्बोधनमा उक्त विषय उठेन। राजनीतिक वृत्तमा प्रधानमन्त्रीले यही अवसरमा निर्वाचन मिति सार्वजनिक गर्ने अनुमान गरिएको थियो।
तर, स्रोतका अनुसार यसै हप्ता नेशनल पार्टीका सांसदहरू क्राइस्टचर्चमा भेला हुने पहिलो ककस बैठकमा प्रधानमन्त्री लक्सनले आम निर्वाचनको मिति घोषणा गर्ने सम्भावना रहेको छ। उक्त बैठकलाई चुनावी तयारीका दृष्टिले महत्वपूर्ण रूपमा हेरिएको छ।
विगतका निर्वाचनहरूको अभ्यास हेर्दा न्युजील्याण्डमा प्रधानमन्त्रीले आम निर्वाचनको मिति प्रायः जनवरी वा फेब्रुअरी महिनामै सार्वजनिक गर्ने परम्परा रहेको देखिन्छ। यही कारणले यसपटक पनि छिट्टै औपचारिक घोषणा हुने अपेक्षा गरिएको छ।
सन् २०२३ को आम निर्वाचनका लागि तत्कालीन प्रधानमन्त्री जसिन्डा आर्डर्नले १९ जनवरी २०२३ मा निर्वाचन मिति घोषणा गरेकी थिइन्, जसअनुसार निर्वाचन १४ अक्टोबर २०२३ मा सम्पन्न भएको थियो। त्यसैगरी सन् २०२० को निर्वाचनका लागि पनि उनले २८ जनवरी २०२० मा निर्वाचन मिति घोषणा गर्दै १९ सेप्टेम्बर २०२० मा मतदान हुने जानकारी दिएकी थिइन्। यद्यपि, कोभिड–१९ महामारीका कारण उक्त निर्वाचन पछि सारेर अक्टोबरमा सम्पन्न गरिएको थियो।
यसअघि सन् २०१७ को निर्वाचनका लागि तत्कालीन प्रधानमन्त्री बिल इङ्ग्लिसले १ फेब्रुअरी २०१७ मा निर्वाचन मिति घोषणा गर्दै २३ सेप्टेम्बर २०१७ मा मतदान हुने जानकारी दिएका थिए। त्यस्तै, सन् २०११ को निर्वाचनका लागि प्रधानमन्त्री जोन कीले २ फेब्रुअरी २०११ मा निर्वाचन मिति सार्वजनिक गर्दै २६ नोभेम्बर २०११ मा मतदान हुने बताएका थिए।
यी सबै उदाहरणहरूले न्युजील्याण्डमा आम निर्वाचनको मिति प्रायः वर्षको सुरुवाती महिनामै घोषणा हुने परम्परा रहेको पुष्टि गर्छ। यही अभ्यासलाई निरन्तरता दिँदै वर्तमान सरकारले पनि यसै महिनाभित्र निर्वाचन मिति सार्वजनिक गर्न सक्ने राजनीतिक विश्लेषकहरूको अनुमान छ। निर्वाचन मिति घोषणा भएसँगै राजनीतिक दलहरू औपचारिक रूपमा चुनावी मोडमा प्रवेश गर्नेछन् भने नीति, नेतृत्व र सम्भावित गठबन्धनबारे बहस अझ तीव्र हुने अपेक्षा गरिएको छ। हाल सबैको ध्यान सरकारको औपचारिक घोषणातर्फ केन्द्रित भएको छ।
