रास्वपाले प्रधानमन्त्री बालेन शाहको नेतृत्वमा गठन हुन लागेको सरकारका मन्त्रीहरूको नाम अन्तिम रूप दिन थालेको छ।
स्रोतका अनुसार अर्थमन्त्रीमा डा. स्वर्णिम वाग्ले र परराष्ट्रमन्त्रीमा शिशिर खनाल नियुक्त हुने लगभग निश्चित भएको छ। त्यस्तै, कानुनमन्त्रीमा सोविता गौतमको नाम पनि तय भइसकेको बताइएको छ।
रास्वपाका एक वरिष्ठ नेताले स्वर्णिम, शिशिर र सोविताको मन्त्रालयसमेत टुंगिसकेको र अन्य मन्त्रीहरूको चयन पनि अन्तिम चरणमा पुगेको जानकारी दिएका छन्। सम्भावित मन्त्रीहरूको सूचीमा सुदन गुरुङ, बिराजभक्त श्रेष्ठ, सस्मित पोखरेल, गणेश पौडेल, विक्रम खनाल, निशा डाँगी, गीता चौधरी र सीता बादी लगायतका नामहरू रहेका छन्। यद्यपि, यी नामहरू आधिकारिक रूपमा पुष्टि भने भइसकेका छैनन्।
स्रोतका अनुसार मन्त्री बन्ने व्यक्तिहरूलाई सभापति रवि लामिछाने, बालेन शाह तथा उनको सचिवालयका सदस्यहरूले फोन र एसएमएसमार्फत जानकारी दिइसकेका छन्।
आज दिउँसो साढे १२ बजे बालेन शाहले प्रधानमन्त्री पदको शपथ लिने कार्यक्रम तय भएको छ, र त्यसपछि मन्त्रीहरूको पनि शपथ ग्रहण हुनेछ।
यसैबीच, सभामुख पदका लागि डीपी अर्यालको नाम पनि तय भएको छ।
