न्युजिल्याण्डमा उष्णकटिबन्धीय चक्रवात ‘भायानु’ पुग्ने सम्भावना बढ्दै गएको भन्दै मौसमविद्हरूले गम्भीर चेतावनी दिएका छन्। मेट सर्भिस का अनुसार आइतबार नर्थ आइल्याण्डमा जीवन जोखिममा पार्ने स्तरको हावाहुरीसहितको खराब मौसम आउन सक्ने संकेत देखिएको छ।
प्रधानमन्त्री क्रिस्टोफर लक्सनले सबै निकायलाई उच्च सतर्कतामा राखिएको बताएका छन्। उनले यसलाई “अत्यन्त ठूलो र क्षतिकारक मौसमीय घटना” भन्दै सर्वसाधारणलाई तयारी अवस्थामा रहन आग्रह गरेका छन्। “आवश्यक सामग्री जोहो गर्नुहोस्, घर वरिपरिका खुकुला सामान सुरक्षित राख्नुहोस्,” उनले सल्लाह दिएका छन्।
मौसम विभागले बुधबार सम्पूर्ण नर्थ आइल्याण्डका लागि प्रारम्भिक गम्भीर मौसम निगरानीजारी गरेको छ। चक्रवातका कारण तीव्र आँधीसँगै भारी वर्षा र समुद्री क्षेत्रमा खतरनाक अवस्था आउने सम्भावना रहेको छ। केही क्षेत्रलाई छिट्टै चेतावनीमा स्तरोन्नति गरिन सक्ने बताइएको छ।
हाल फिजीको दक्षिणतर्फ रहेको यो चक्रवात तेस्रो श्रेणीको रहेको र यसको केन्द्रमा करिब १३० किलोमिटर प्रतिघण्टासम्मको हावाको गति रहेको मौसमविद् अलाना बुरोजले जानकारी दिएकी छन्। तर यसको ठ्याक्कै मार्ग अझै स्पष्ट नभएकाले कुन क्षेत्र सबैभन्दा बढी प्रभावित हुन्छ भन्ने यकिन भइसकेको छैन।
मौसमविद् जोन लका अनुसार चक्रवातको प्रभाव यसको गतिपथमा निर्भर रहनेछ। “आगामी दिनमा पूर्वानुमान स्पष्ट हुँदै जाँदा बढी जोखिम भएका क्षेत्रहरूलाई लक्षित गरेर चेतावनी जारी गरिनेछ,” उनले बताएका छन्।
कार्यवाहक आपतकालीन व्यवस्थापन मन्त्री Chris Penk ले चक्रवातले ठूलो क्षति पुर्याउन सक्ने भन्दै विशेष सावधानी अपनाउन आग्रह गरेका छन्। पहिल्यै पानीले भिजेको जमिनमा थप वर्षा हुँदा रुख ढल्ने, पहिरो जाने, बाढी आउने तथा नदीहरू खतरनाक बन्ने जोखिम बढ्ने उनले बताएका छन्। साथै, नर्थ आइल्याण्डमा विद्युत् अवरुद्ध, सडक बन्द र केही बस्ती अलग हुन सक्ने जोखिम रहेको चेतावनी दिइएको छ।
यसैबीच, प्रशान्त क्षेत्रमा अर्को शक्तिशाली चक्रवात ‘मैला’ पनि सक्रिय रहेको छ, जसलाई पाँचौँ श्रेणीमा स्तरोन्नति गरिएको छ। यसको केन्द्रमा २१५ किलोमिटर प्रतिघण्टासम्मको हावा र २९५ किलोमिटर प्रतिघण्टासम्मका झट्का रहेको जनाइएको छ, र यो अस्ट्रेलियातर्फ अघि बढिरहेको छ।
हाल टास्मान र बे अफ प्लेण्टी क्षेत्रमा भारी वर्षाको चेतावनी जारी गरिएको छ। साथै, वाइकाटो, टाउमारुनुई र टाउपो लगायतका क्षेत्रमा भारी वर्षाको निगरानी जारी छ। स्थानीय निकायहरूले सम्भावित पहिरोको जोखिमका कारण आवश्यक परे सुरक्षित स्थानमा सर्न पनि आग्रह गरेका छन्।
मौसमविद्हरूले ‘भायानु’ चक्रवातमाथि नजिकबाट निगरानी भइरहेको भन्दै सर्वसाधारणलाई आधिकारिक सूचना पछ्याउन र सुरक्षित रहन अपिल गरेका छन्।
