न्युजिल्याण्डको लेबर पार्टीले सन् २०२५ को अन्त्यतिर अघि सारेको ‘मेडिकार्ड’ नामक स्वास्थ्य सम्बन्धी नयाँ नीतिगत प्रस्तावले प्रत्येक नागरिकलाई वर्षमा तीन पटकसम्म निःशुल्क जीपी (डाक्टर) भेटघाटको सुविधा दिने लक्ष्य राखेको छ। यो योजना लागू भएमा स्वास्थ्य सेवामा पहुँच सहज बनाउने र खर्च घटाउने उद्देश्य राखिएको छ। यो योजना लेबर पार्टीले आगामी निर्वाचनपछि सरकार गठन गरेमा मात्र कार्यान्वयनमा आउनेछ।
प्रस्तावअनुसार, मेडिकार्ड न्युजिल्याण्डका नागरिक तथा स्थायी बासिन्दालाई जन्मसाथ वा बसोबास अधिकार प्राप्त भएपछि उपलब्ध गराइनेछ। यस कार्डमार्फत प्रयोगकर्ताको विवरण र सेवा उपयोगको रेकर्ड राखिनेछ, जसलाई भौतिक कार्डका साथै मोबाइल एपमार्फत पनि प्रयोग गर्न सकिनेछ।
यस योजनाअन्तर्गत प्रत्येक व्यक्तिले वर्षमा तीन पटकसम्म निःशुल्क सामान्य चिकित्सक (जीपी) सेवा पाउनेछन्। विशेष गरी महँगो स्वास्थ्य सेवा खर्चका कारण डाक्टर भेट्न गाह्रो हुने नागरिकलाई लक्षित गर्दै यो योजना ल्याइएको बताइएको छ।
योजना कार्यान्वयनका लागि आवश्यक खर्च ‘टार्गेटेड क्यापिटल गेन्स ट्याक्स’ (विशेष पूँजीगत लाभ कर) मार्फत जुटाउने प्रस्ताव गरिएको छ। साथै, पाठेघरको मुखको क्यान्सर (सर्भाइकल क्यान्सर) परीक्षणलाई पनि निःशुल्क बनाउने अतिरिक्त सुविधा समावेश गरिएको छ।
त्यसैगरी, यो योजना ‘फ्यामिली डाक्टर लोन स्किम’ सँग जोडिएको छ, जसमार्फत जीपी सेवा प्रदायकलाई आर्थिक सहयोग उपलब्ध गराउने लक्ष्य राखिएको छ।
तर लेबर पार्टीले अघि सारेको यो योजना हालसम्म नीतिगत प्रस्तावकै रूपमा रहेको छ । उक्त योजना लेबर पार्टीले आगामी निर्वाचनपछि सरकार गठन गर्न सकेको अवस्थामा मात्र लागू गरिने बताइएको छ।
