न्युजिल्याण्डका पश्चिमी र उत्तरी क्षेत्रमा भारी वर्षा हुने पूर्वानुमान गरिएको छ भने दक्षिणी भागमा शक्तिशाली हुरी चल्ने जोखिम रहेको छ। मौसम विभाग (MetService) का अनुसार एक जटिल ट्रफ प्रणाली शुक्रबार साउथ आईल्याण्डतर्फ प्रवेश गरी शनिबार र आइतबारको सुरुवातमा नर्थ आईल्याण्डतर्फ सर्नेछ, जसका कारण देशभर मौसम बिग्रिने सम्भावना देखिएको छ।
पूर्वानुमान अनुसार केही स्थानमा भारी वर्षासँगै चट्याङ्गसहितको वर्षा पनि हुन सक्छ। तारानाकी, बुलर र ग्रे जिल्ला, क्यान्टरबरीका ताल तथा नदीको मुहान क्षेत्र र वेस्टल्यान्ड जिल्लाका पहाडी क्षेत्रमा ‘ओरेन्ज’ स्तरको भारी वर्षा चेतावनी जारी गरिएको छ। क्यान्टरबरीका नदी तथा तालको मुहान क्षेत्रमा १५० मिलिमिटरसम्म वर्षा हुन सक्ने अनुमान छ भने बुलर र ग्रे जिल्लामा करिब १२० मिलिमिटरसम्म पानी पर्न सक्नेछ।
MetService ले ती क्षेत्रमा नदी तथा खोलाहरू छिट्टै बढ्न सक्ने, सतहमा बाढी आउन सक्ने र पहिरोको जोखिम समेत रहने चेतावनी दिएको छ। यसका साथै नर्थल्याण्ड, तस्मान, वेलिङ्टन र ओटागोका केही भागमा भारी वर्षाको ‘वाच’ जारी गरिएको छ।
यता, क्यान्टरबरी हाई कन्ट्री क्षेत्रमा शुक्रबार दिउँसो २ बजेदेखि शनिबार बिहान ५ बजेसम्म शक्तिशाली हावाको ‘वाच’ लागू गरिएको छ। उत्तरपश्चिमी हावा केही खुला स्थानमा निकै तीव्र (severe gale) स्तरसम्म पुग्न सक्ने र यसलाई चेतावनीमा स्तरोन्नति गरिने सम्भावना मध्यम रहेको जनाइएको छ।
देशका अन्य भागमा पनि वर्षा हुने सम्भावना रहेकाले वर्षात्का कपडा र छाता अनिवार्यजस्तै हुने देखिएको छ। विशेषगरी अकल्याण्डमा साँझतिर भारी र चट्याङ्गसहितको वर्षा हुन सक्ने पूर्वानुमान गरिएको छ।
अधिकारीहरूले सर्वसाधारणलाई सतर्क रहन, यात्रा गर्दा सावधानी अपनाउन र मौसमसम्बन्धी अपडेटहरू नियमित रूपमा हेर्न आग्रह गरेका छन्।
