न्युजिल्याण्डको साउथ आईल्याण्डमा हिमपात सुरु भएको छ । मौसमका कारण दुई महत्वपूर्ण सडक मार्गमा रोड स्नोफल वार्निङ जारी गरिएको छ, जसले यात्रु तथा चालकलाई विशेष सतर्क रहन आग्रह गरेको छ।
पोर्टर्स पास (एसएच७३) क्षेत्रमा सोमबार, २० अप्रिल साँझ ७ बजेदेखि मंगलबार, २१ अप्रिल बिहान ८ बजेसम्म १३ घण्टाको चेतावनी जारी गरिएको छ। पूर्वानुमानअनुसार सोमबार साँझबाट पानीसँगै परेको हिमपात ८०० मिटर उचाइसम्म झर्न सक्नेछ। यस अवधिमा सडकमा २ देखि ३ सेन्टिमिटरसम्म हिउँ जम्न सक्ने बताइएको छ।
त्यसैगरी लुइस पास (एसएच७) क्षेत्रमा सोमबार, २० अप्रिल बेलुका ४ बजेदेखि मंगलबार, २१ अप्रिल बिहान ६ बजेसम्म १४ घण्टाको चेतावनी लागू गरिएको छ। मौसम पूर्वानुमानअनुसार सोमबार दिउँसोदेखि वर्षा क्रमशः हिमपातमा परिवर्तन हुँदै पासको चुचुरो आसपास सुरु हुनेछ र साँझसम्म ८०० मिटर उचाइसम्म झर्नेछ। विशेषगरी सोमबार साँझ हिमपातको प्रभाव बढी रहनेछ भने मंगलबार बिहानतिर क्रमशः कम हुँदै जाने अपेक्षा गरिएको छ।
अधिकारीहरूले लुइस पास क्षेत्रमा चुचुरो वरपर र दक्षिणतर्फ ३ देखि ५ सेन्टिमिटरसम्म हिउँ जम्न सक्ने चेतावनी दिएका छन्। हिमपातका कारण सडक चिप्लो, दृश्यता कम र यात्रा जोखिमपूर्ण हुन सक्ने भएकाले आवश्यक नपरेसम्म यात्रा नगर्न, सवारी साधनमा चेन बोक्न र पछिल्लो सडक अवस्थाबारे जानकारी लिएर मात्रै यात्रा गर्न सुझाव दिइएको छ।
