न्युजिल्याण्ड र भारतबीचको बहुप्रतीक्षित स्वतन्त्र व्यापार सम्झौतामा आज औपचारिक रूपमा हस्ताक्षर हुने भएको छ। न्युजिल्याण्डका व्यापार मन्त्री Todd McClay ले आज राति करिब ९ बजे (न्युजिल्याण्ड समयअनुसार) नयाँ दिल्लीमा उक्त सम्झौतामा हस्ताक्षर गर्ने कार्यक्रम तय गरिएको छ।
मन्त्री म्याक्ले नेतृत्वको प्रतिनिधिमण्डलमा विभिन्न राजनीतिक दलका सांसदहरूका साथै ३० भन्दा बढी व्यवसायिक प्रतिनिधिहरू सहभागी छन्। उनीहरूले भारतका उद्योग तथा वाणिज्य मन्त्री Piyush Goyal सँग संयुक्त व्यवसायिक सम्मेलन पनि आयोजना गर्नेछन्, जसलाई दुवै देशबीचको आर्थिक सम्बन्ध विस्तारको महत्वपूर्ण कदमको रूपमा हेरिएको छ।
सम्झौताबारे बोल्दै म्याक्लेले यसलाई न्युजिल्याण्डका लागि ऐतिहासिक उपलब्धि बताएका छन्। उनका अनुसार १ अर्ब ४० करोड जनसंख्या भएको भारतको अर्थतन्त्र तीव्र रूपमा विस्तार हुँदै गएको छ र भविष्यका उपभोक्ताको ठूलो बजार बन्नेछ। “न्युजिल्याण्डले यही बजारको सुरुवाती चरणमै प्रवेश पाइरहेको छ, जसले दीर्घकालमा हाम्रो अर्थतन्त्रलाई मजबुत बनाउनेछ,” उनले बताएका छन्।
यो सम्झौता सम्पन्न गर्न म्याक्लेले हालको सरकार गठन भएपछि सात पटक भारत भ्रमण गरेका थिए। प्रधानमन्त्री Christopher Luxon ले सन् २०२३ को निर्वाचन अभियानकै क्रममा यस्तो सम्झौता गर्ने प्रतिबद्धता जनाएका थिए, जसलाई अहिले कार्यान्वयनको चरणमा पुर्याइएको हो।
यसअघि विपक्षी दल लेबर पार्टीले पनि उक्त सम्झौतामा समर्थन जनाइसकेको छ, जसले संसदमार्फत आवश्यक कानुनी प्रक्रिया पारित गर्न सहज हुने देखिएको छ। यससँगै भारत–न्युजिल्याण्डबीचको व्यापारिक सहकार्य नयाँ उचाइमा पुग्ने अपेक्षा गरिएको छ।
