न्युजिल्याण्ड सरकारले Accredited Employer Work Visa (AEWV) अन्तर्गत Skill Level 3 का कामदारहरूका लागि पनि न्यूनतम अंग्रेजी भाषा योग्यता अनिवार्य गर्ने घोषणा गरेको छ। नयाँ व्यवस्था आगामी १ जुन २०२६ देखि लागू हुनेछ।
यसअघि अंग्रेजी भाषा आवश्यकताको नियम मुख्य रूपमा Skill Level 4 र 5 का भूमिकामा मात्र लागू हुँदै आएको थियो। अब भने ANZSCO तथा National Occupation List (NOL) अन्तर्गत पर्ने Skill Level 3 का पेशामा पनि अंग्रेजी क्षमता देखाउनुपर्नेछ।
सरकारका अनुसार यो नियमले कामदारहरूलाई दैनिक जीवन, कार्यस्थल तथा समुदायमा सहज रूपमा संवाद गर्न सहयोग गर्नेछ। आवश्यक स्तर “सामान्य दैनिक प्रयोगको अंग्रेजी” मात्र भएको र उच्चस्तरको अंग्रेजी नचाहिने बताइएको छ।
आवेदकहरूले IELTS 4.0 वा सो सरहको अंग्रेजी परीक्षा पास गर्नुपर्नेछ, अथवा आफ्नो नागरिकता, अध्ययन वा कार्य अनुभवमार्फत अंग्रेजी क्षमता प्रमाणित गर्न सक्नेछन्।
तर, केही व्यक्तिहरूलाई छुट पनि दिइने भएको छ। यदि कसैको हालको AEWV भिसा १ डिसेम्बर २०२६ वा सोभन्दा अघि समाप्त हुने अवस्थामा छ र उनीहरूले समयमै पुनः Skill Level 3 को AEWV आवेदन दिन्छन् भने नयाँ अंग्रेजी नियम लागू नहुन सक्ने बताइएको छ।
न्युजिल्याण्ड अध्यागमन विभागले अन्य AEWV सम्बन्धी नियमहरू भने यथावत रहने जनाएको छ।
