शुक्रबार साँझ वेलिङ्टन विमानस्थलमा आगलागी भएपछि सयौं यात्रुहरू अलपत्र परेका छन्। धुवाँ देखिएसँगै अलार्म बजेपछि विमानस्थलको मुख्य टर्मिनल भवन तथा दक्षिणपश्चिम क्षेत्र खाली गराइएको थियो।
विमानस्थलका प्रवक्ताका अनुसार साँझ ७ बजेपछि धुवाँ देखिएसँगै सुरक्षालाई प्राथमिकता दिँदै यात्रु तथा कर्मचारीहरूलाई सुरक्षित रूपमा बाहिर निकालिएको थियो। घटनामा कुनै मानवीय क्षति नभएको बताइएको छ।
आगलागीका कारण एयर न्युजिल्याण्डका सबै आगमन तथा प्रस्थान उडानहरू करिब चार घण्टासम्म रोकिएका थिए। यद्यपि केही अन्तर्राष्ट्रिय उडानहरू भने रातभरि निर्धारित समयमै सञ्चालन भएका थिए।
विमानस्थलको वेबसाइटअनुसार सिड्नीबाट आएका क्वान्टास र एयर न्युजिल्याण्डका दुई उडान मध्यराततिर सुरक्षित रूपमा अवतरण गरेका थिए।
यात्रुहरूले आफ्नो गन्तव्यमा पुग्न नसक्नुका साथै सामानसमेत लिन नपाएका कारण विमानस्थलमा केही समय अन्योलको अवस्था सिर्जना भएको थियो। प्रभावित यात्रुहरूलाई खाना, पेय पदार्थ, कम्बल तथा नियमित जानकारी उपलब्ध गराइएको विमानस्थल प्रशासनले जनाएको छ।
फायर एण्ड इमर्जेन्सी न्युजिल्याण्ड (एफईएनजेड) का अनुसार साँझ ७:१५ बजे स्वचालित अलार्ममार्फत आगलागीको सूचना प्राप्त भएपछि वेलिङ्टन फायर ब्रिगेड र विमानस्थलको दमकल टोली घटनास्थलमा खटिएका थिए। कुल नौ वटा दमकल गाडी परिचालन गरिएको थियो।
प्रारम्भिक जानकारीअनुसार कुनै मेसिनरी उपकरणमा आगलागी भएको हुन सक्ने अनुमान गरिएको छ। आगोका कारण स्प्रिङ्कलर प्रणालीसमेत सक्रिय भएको थियो। आगलागी भवनभित्र वा बाहिर कहाँ भएको थियो भन्ने विषय भने तत्काल स्पष्ट हुन सकेको छैन।
विमानस्थल प्रशासनले शनिबार विमानस्थल नियमित रूपमा सञ्चालन हुने जनाएको छ। तथापि, केही उडानहरूमा ढिलाइ वा अन्य प्रभाव पर्न सक्ने भएकाले यात्रुहरूलाई सम्बन्धित वायुसेवा कम्पनीसँग सम्पर्क गरी जानकारी लिन आग्रह गरिएको छ।
आगलागीको वास्तविक कारणबारे एफईएनजेडले अनुसन्धान गरिरहेको छ। विमानस्थल प्रशासनले घटनाबाट प्रभावित यात्रुसँग असुविधाप्रति क्षमायाचना गर्दै सुरक्षा नै आफ्नो पहिलो प्राथमिकता रहेको जनाएको छ।
