न्युजिल्याण्डको प्रतिष्ठित संसद भवन ‘बिहाइभ’ मा व्यापक मर्मत तथा स्तरोन्नतिको तयारी सुरु भएको छ। भवनको संरचनागत अवस्था, भेन्टिलेसन प्रणाली तथा अन्य महत्वपूर्ण पूर्वाधारहरू पुराना बन्दै गएपछि आवश्यक सुधारका विषयमा छलफल तीव्र भएको हो।
संसदका सभामुख गेरी ब्राउनलीका अनुसार सन् १९८१ मा निर्माण सम्पन्न भएको बिहाइभ भवनमा समयसँगै विभिन्न संरचनागत समस्या देखिन थालेका छन्। विशेषगरी भेन्टिलेसन प्रणाली, बाहिरी झ्यालहरू तथा भवनका केही बाह्य संरचनामा उल्लेखनीय क्षय देखिएको बताइएको छ।
ब्राउनलीले संसदको गभर्नेन्स तथा प्रशासन समितिमा बोल्दै भवनमा आवश्यक मर्मत कार्यलाई थप समयसम्म टार्न नसकिने बताए। उनका अनुसार भवनमा व्यापक स्तरको स्तरोन्नति गर्नुपर्ने भएकाले भविष्यमा केही समयका लागि भवन खाली गर्ने विकल्पसमेत विचाराधीन रहेको छ।
बिहाइभ भवन न्युजिल्याण्ड सरकारको प्रमुख प्रशासनिक केन्द्रका रूपमा परिचित छ। यहाँ अधिकांश मन्त्रीहरूको कार्यालय, मन्त्रिपरिषद्को बैठक कक्ष, प्रधानमन्त्रीको साप्ताहिक पत्रकार सम्मेलन हुने थियटर तथा अन्य प्रशासनिक सुविधाहरू रहेका छन्।
सभामुख ब्राउनलीले तत्काल कुनै निर्णय नभए पनि आगामी संसदीय कार्यकालमा यस विषयमा ठोस निर्णय हुन सक्ने संकेत दिएका छन्। उनका अनुसार ५० वर्ष नजिक पुग्दै गरेका भवनहरूमा ठूलो स्तरको मर्मत र आधुनिकीकरण आवश्यक पर्नु स्वाभाविक हो र बिहाइभ पनि त्यही चरणमा प्रवेश गरिरहेको छ।
यसैबीच संसद भवन परिसरको पछाडि म्युजियम स्ट्रिट क्षेत्रमा नयाँ छतले कार्यालय भवन निर्माण भइरहेको छ। सन् २०२७ को सुरुआतसम्म सम्पन्न हुने अपेक्षा गरिएको उक्त भवनमा करिब ६ सय कर्मचारी तथा सांसदलाई स्थान उपलब्ध हुनेछ। आवश्यकता परेमा मर्मत अवधिमा केही सांसद र संसदीय कर्मचारीलाई त्यहाँ सार्ने योजना समेत बनाइएको छ।
न्युजिल्याण्ड सरकारका लागि ऐतिहासिक तथा प्रशासनिक रूपमा महत्वपूर्ण मानिने बिहाइभ भवनको स्तरोन्नतिले भविष्यमा संसदको कार्यसम्पादनलाई थप सुरक्षित, आधुनिक र प्रभावकारी बनाउने अपेक्षा गरिएको छ।
