न्युजिल्याण्डको साउथ आईल्याण्डका उच्च पहाडी भूभागमा हिमपात सुरु भएको छ। मौसममा आएको परिवर्तनसँगै विभिन्न पास तथा उचाइ भएका सडकमा हिउँ जम्न थालेपछि चालकहरूलाई सावधानी अपनाउन आग्रह गरिएको छ।
मौसम पूर्वानुमानअनुसार शुक्रबार बिहानदेखि तापक्रम घटेसँगै लुइस पास (स्टेट हाइवे ७) र पोर्टर्स पास (स्टेट हाइवे ७३) लगायतका क्षेत्रमा हिमपात भएको हो। यी क्षेत्रका सडकमा केही सेन्टिमिटरसम्म हिउँ जम्ने अनुमान गरिएको छ, जसले सवारी आवागमन प्रभावित हुन सक्ने बताइएको छ।
न्युजिल्याण्ड ट्रान्सपोर्ट एजेन्सी (NZTA) ले उच्च पहाडी क्षेत्रमा यात्रा गर्ने चालकहरूलाई सडकको पछिल्लो अवस्था जाँच गरेर मात्र यात्रा गर्न, आवश्यक परे स्नो चेन साथमा राख्न तथा मौसमअनुसार सावधानी अपनाउन आग्रह गरेको छ।
यसैबीच, साउथ आईल्याण्डका केही स्थानमा हिमपातका कारण रमणीय दृश्य देखिएको छ। लिण्डिस पास, लुइस पास र पोर्टर्स पास आसपासका पहाडी क्षेत्र सेताम्मे बनेका छन्, जसले जाडो मौसमको वास्तविक अनुभूति दिलाएको छ।
उता, उत्तर टापुमा भने पछिल्ला दिनहरूमा परेको भारी वर्षा र तीव्र हावाहुरीका कारण केही स्थानमा सडक अवरुद्ध भएका छन्। मौसमविद्हरूले देशका विभिन्न क्षेत्रमा अझ केही दिन चिसो मौसम कायम रहने र उच्च भूभागमा थप हिमपात हुन सक्ने पूर्वानुमान गरेका छन्।
अधिकारीहरूले विशेषगरी पहाडी सडकमा यात्रा गर्नेहरूले मौसम र सडकको अवस्थाबारे जानकारी लिएर मात्र यात्रा गर्न तथा आवश्यक सुरक्षा सामग्रीको व्यवस्था गर्न आग्रह गरेका छन्।
