न्युजिल्याण्डको साउथ आईल्याण्डका विभिन्न क्षेत्रमा बिहीबारदेखि शक्तिशाली हावाहुरी र भारी हिमपात हुने पूर्वानुमान गरिएको छ। MetService ले धेरै स्थानका लागि Strong Wind Watch र प्रमुख हिमाली राजमार्गहरूका लागि Road Snowfall Warning जारी गरेको छ।
मौसमविद्हरूका अनुसार बिहीबार क्यान्टरबरीको उच्च पहाडी क्षेत्रमा उत्तरपश्चिमी हावा निकै तीव्र हुने सम्भावना छ। यद्यपि, यी तातो ‘फोहन (Foehn)’ हावाका कारण क्राइस्टचर्चको तापक्रम करिब १६ डिग्री सेल्सियससम्म पुग्ने अपेक्षा गरिएको छ।
तर शुक्रबारदेखि मौसममा ठूलो परिवर्तन आउनेछ। दक्षिणबाट आउने चिसो हावाका कारण तापक्रम उल्लेखनीय रूपमा घट्ने, हावा अझ बलियो हुने तथा साउथ आईल्याण्डका धेरै क्षेत्रमा हिमपात हुने पूर्वानुमान गरिएको छ।
MetService ले Crown Range Road, Milford Road (State Highway 94), Arthur’s Pass (State Highway 73) र Lewis Pass (State Highway 7) मा हिमपातको चेतावनी जारी गरेको छ।
विशेषगरी Arthur’s Pass र Lewis Pass क्षेत्रमा १० देखि २० सेन्टिमिटरसम्म हिमपात हुन सक्ने अनुमान गरिएको छ। शनिबारसम्म हिमपातको स्तर समुद्री सतहबाट २०० मिटर उचाइसम्म झर्न सक्ने भएकाले तल्लो क्षेत्रमा पनि हिउँ पर्ने सम्भावना रहेको छ।
साउथ ल्याण्डको Milford Road (SH94) मा बिहीबार रातिदेखि हिमपात सुरु हुने अनुमान गरिएको छ। यसका कारण Lower Hollyford Road को मोडदेखि The Chasm सम्मको सडक बिहीबार साँझ ५ बजेदेखि बन्द गरिनेछ। मौसम अनुकूल भएमा शुक्रबार बिहान ढिलो पुनः सञ्चालन गरिने भए पनि दिनभर थप हिमपातका कारण पुनः अवरोध आउन सक्ने चेतावनी दिइएको छ।
NZ Transport Agency (NZTA/Waka Kotahi) ले विशेषगरी अग्ला ट्रक तथा बस चालक, ट्रेलर तान्ने सवारी र मोटरसाइकल चालकलाई तीव्र हावाहुरीका बेला अत्यधिक सावधानी अपनाउन आग्रह गरेको छ।
यात्रा गर्नुअघि मौसम र सडकको अवस्था जाँच गर्न, न्यानो लुगा, खानेकुरा र पानी साथमा राख्न तथा आवश्यकता परे राज्य राजमार्गहरू अस्थायी रूपमा बन्द हुन सक्ने भएकाले वैकल्पिक योजना बनाउन पनि अनुरोध गरिएको छ।
हिउँ परेको अवस्थामा चालकहरूले गति कम राख्ने, अगाडिको सवारीसँग पर्याप्त दूरी कायम गर्ने, अचानक ब्रेक वा मोड्ने कार्य नगर्ने तथा आफ्नो सवारी अन्य चालकलाई स्पष्ट देखिने गरी चलाउन सुझाव दिइएको छ।
हावाहुरीको चेतावनी क्यान्टरबरी हाई कन्ट्री, कोस्टल साउथल्याण्ड, सदर्न फिओर्डल्याण्ड, क्राइस्टचर्च, बैंक्स पेनिन्सुला, क्यान्टरबरी प्लेन्स र कोस्टल ओटागोका विभिन्न क्षेत्रमा जारी गरिएको छ।
अधिकारीहरूले साउथ आईल्याण्डका बासिन्दा तथा यात्रुहरूलाई मौसमको पछिल्लो जानकारी नियमित रूपमा हेर्न र आवश्यक नपरेसम्म हिमपात प्रभावित मार्गहरूमा यात्रा नगर्न आग्रह गरेका छन्।
