गत जुन २४ तारिकका दिन न्युजिल्याण्डको एस्बर्टनमा क्वाड बाईक दुर्घटना परि ज्यान गुमाएका सुनसरी मधेशाका सुवास घिमिरेको शव न्युजिल्याण्डबाट नेपाल पठाईएको छ । घिमिरेको शव हिजो राती सिंगापुर एयरलाइन्स मार्फत नेपाल पठाईएको हो । उनको शव नेपाली समय अनुसार आज राती १० बजे नेपाल पुग्ने छ । परिवारका श्रोतका अनुसार घिमिरेको अन्तिम संस्कार भोली आईतबार काठमाडौंमा गरिने छ । घिमिरेको पशुपति आर्यघाटमा भोली बिहान दाहसंस्कार गरिने परिवारका एक सदस्यले जानकारी दिए । उनको अन्तिम संस्कारमा सहभागी हुन परिवारका सदस्य काठमाडौं पुगिसकेका छन् । मृतक घिमिरेका आमा, श्रीमती, छोरा, भाई र बुहारी नेपाल मै छन् भने अर्का एक भाई रोजगारीका लागि कतारमा छन् । सुवाश ८ वर्ष अगाडि न्युजिल्याण्ड आएका थिए । उनी न्युजिल्याण्डको साउथ आईल्याण्डको एस्बर्टन भन्ने ठाउँको एक डेरी फार्ममा काम गर्थे । कामकै शिलशिलामा उनको गत जुन २४ तारिकका दिन क्वाड बाईक दुर्घटना मृत्यु भएको थियो ।
