न्यूजिल्याण्डका उपप्रधान तथा बिदेशमन्त्री विन्स्टन पीटर्स बुधबार नेपालको ऐतिहासिक भ्रमणमा आउने भएका छन्। यो भ्रमण न्यूजिल्यान्डका परराष्ट्र मन्त्रीको पहिलोपटकको नेपाल भ्रमण हो, जसले दुई देशबीचको सम्बन्धलाई नयाँ उचाइमा पुर्याउने अपेक्षा गरिएको छ।
काठमाडौंमा पीटर्सले राष्ट्रपति रामचन्द्र पौडेल, प्रधानमन्त्री केपी शर्मा ओली र परराष्ट्र मन्त्री अर्जु राणा देउवासँग भेटवार्ता गर्नेछन्। यो भ्रमण तेन्जिङ नोर्गे र सर एडमण्ड हिलारीको १९५३ को सगरमाथा आरोहणको वार्षिकोत्सवको परिप्रेक्ष्यमा हुने छ, जसले दुई देशबीचको ऐतिहासिक सम्बन्धलाई पुनः स्मरण गराउनेछ।
बिदेशमन्त्री पीटर्सले सगरमाथा क्षेत्रका हिमालयन ट्रस्ट (न्यूजिल्याण्ड) द्वारा समर्थित दुई प्रमुख परियोजनाहरूको अवलोकन गर्नेछन्। यस भ्रमणमा विकास सहायता सम्बन्धी नयाँ घोषणाहरू हुने अपेक्षा गरिएको छ। न्यूजिल्यान्डले १९९४ देखि नेपालमा शिक्षा, क्षमता विकास र कृषि क्षेत्रमा करिब ३० मिलियन न्यूजिल्याण्ड डलरको सहायता प्रदान गर्दै आएको छ। यसका अतिरिक्त, सर एडमण्ड हिलारी फेलोशिपमार्फत नेपाली युवाहरूलाई = न्यूजिल्याण्डमा अध्ययन र अनुभव सँगाल्ने अवसर प्रदान गरिएको छ।
भ्रमणको क्रममा पीटर्सले नेपाली अधिकारीहरूसँग द्विपक्षीय सम्बन्धको समीक्षा गर्नेछन् र आर्थिक तथा सांस्कृतिक सहकार्यलाई अझ सुदृढ बनाउने उपायहरूमा छलफल गर्नेछन्। न्यूजिल्यान्ड र नेपालबीचको सम्बन्ध सगरमाथा आरोहणको ऐतिहासिक क्षणमा आधारित छ, जसले दुई देशबीचको मित्रता र सहकार्यलाई गहिरो बनाएको छ।
