भिजिट भिसा प्रकरणमा मुछिएका गृहमन्त्री रमेश लेखकको राजीनामा माग गर्दै विपक्षी दलहरूले प्रतिनिधिसभाको मंगलबार बसेको बैठकमा अवरोध गरेका छन् ।
विपक्षी दलहरूको अवरोधका कारण बैठक आधा घण्टका लागि स्थगित भएको छ । बैठकमा प्रमुख प्रतिपक्षी दल नेकपा (माओवादी केन्द्र), राष्ट्रिय स्वतन्त्र पार्टी र राष्ट्रिय प्रजातन्त्र पार्टीसहितका विपक्षीले भिजिट भिसा प्रकरणमा गृहमन्त्री लेखकको राजीनामा माग्दै नाराबाजी गरे ।
उनीहरूले गृहमन्त्रीको राजीनामा नआएसम्म नियमित बैठक चल्न नसक्ने अडान लिएका छन् ।
प्रमुख प्रतिपक्षी माओवादी केन्द्रका उपमहासचिव वर्षमान पुन र रास्वपाका शिशिर खनालले बोलेपछि संसद्मा अवरोध गरिएको हो । उनीहरूले गृहमन्त्रीको राजीनामालाई बटमलाइन बनाएका छन् । बजेट ल्याउने बेलामा उनीहरूले सदन चल्न नदिने अडान लिएका छन् ।
सभामुख देवराज घिमिरेले सत्तापक्षबाट नेपाली कांग्रेसका प्रमुख सचेतक श्याम घिमिरेलाई बोल्न दिए । घिमिरे बोल्न सुरु गरेपछि विपक्षी दलका सांसदले गृहमन्त्रीको राजीनामा मागेर नाराबाजी गरे । त्यसपछि सभामुख घिमिरेले बैठक आधा घण्टालाई रोकेका छन् ।
माओवादी उपमहासचिव पुनले भिजिट भिसा प्रकरणमा अर्बौँको भ्रष्टाचार हुँदा यसमा राजनीतिक संलनग्ता रहेको आशंका गरेका छन् । उनले भिजिट भिसा प्रकरण राजनीतिक संरक्षणबिना सम्भव नभएको टिप्पणी गरे ।
‘अख्तियारले मुख्य आरोपी भनेका तीर्थराज भट्टराईलाई गृहमन्त्रीकै अग्रसरतामा त्रिभुवन अन्तर्राष्ट्रिय विमानस्थलमा पठाइएको देखिन्छ’, उनले भने, ‘विवादित पृष्ठभूमि भएका र यसभन्दा पहिले पनि विभिन्न अनियमिततामा जोडिएका सहसचिवलाई रोजीछाडी कसरी मालदार अड्डामा पठाउनुभयो, के साँच्चै मन्त्रीजीलाई ती सहसचिव एकदम स्वच्छ र सक्षम छन् भनेर हो कि कि अन्य कुनै स्वार्थ थियो ? यो अनुसन्धानको विषय हो ।’
गृहमन्त्री लेखकलाई अनुसन्धानको लागि तत्काल राजीनामा दिन पुनले आग्रह गरे । यसअघि पनि विभिन्न मन्त्रीबारे प्रश्न उठ्दा अहिलेका गृहमन्त्री लेखक तत्कालीन विपक्षमा हुँदा यसरी नै नैतिकताको प्रश्न उठाएको उनले स्मरण गराए । उनले लेखकलाई राजीनामा दिन भनेका छन् ।
