नेपालमा स्वागत गर्नु भएकोमा परराष्ट्रमन्त्री देउवालाई धन्यवाद।
हामीलाई यो ऐतिहासिक अवसरमा नेपाल आउन पाएकोमा निकै खुशी लागेको छ। यो न्यूजील्याण्डका परराष्ट्रमन्त्रीद्वारा नेपाल गरिएको पहिलो भ्रमण हो, र भोलि तेन्जिङ नोर्गे र एडमण्ड हिलारीले सगरमाथा शिखर आरोहण गरेको ७२ औं वार्षिकोत्सव पनि हो।
नोर्गे र हिलारीको १९५३ को उपलब्धि दुबै देशहरूको इतिहासमा एक महत्वपूर्ण मोड थियो, जसले दुई देशबीचको द्विपक्षीय सम्बन्धलाई नयाँ उचाइमा पुर्यायो।
त्यो साझा इतिहासको विरासत आज पनि जीवित छ र हामीबीचको लामो, मैत्रीपूर्ण सम्बन्धमा परिलक्षित हुन्छ।
मन्त्री देउवासँगको छलफलमा हामीले सगरमाथा क्षेत्रको विकास र शिक्षाको लागि हिलारीद्वारा स्थापना गरिएको हिमालयन ट्रस्टलाई न्यूजील्याण्डले ७० वर्षभन्दा बढी समयदेखि दिँदै आएको समर्थनबारे चर्चा गर्यौं।
हामीबीच विकास र शिक्षामा लामो समयदेखिको सहकार्यबारे पनि छलफल भयो। कोलम्बो योजनाअन्तर्गत सुरु भएको सहयोग र विभिन्न छात्रवृत्तिहरूमार्फत, नेपाली विद्यार्थीहरू ७० वर्षभन्दा बढी समयदेखि न्यूजील्याण्डमा अध्ययन गर्दै आएका छन्। शिक्षा क्षेत्रमा सहकार्य हाम्रो द्विपक्षीय सम्बन्धको एक महत्वपूर्ण पक्ष हो, र हामी यसलाई अझ मजबुत बनाउँदै लैजानेछौं।
हामीले आगामी तीन वर्षभित्र नेपालमा विकास परियोजनाहरू र छात्रवृत्तिका लागि न्यूजील्याण्डले २५ लाख न्यूजील्याण्ड डलर योगदान दिने प्रतिबद्धता पनि घोषणा गरेका छौं।
हामीले जलवायु परिवर्तनको मुद्दामा नेपालले खेलेको सकारात्मक भूमिकालाई सराहना गर्यौं, र नेपालले Global Green Growth Institute मा न्यूजील्याण्डले दिएको १५ मिलियन डलरको योगदानबाट लाभ लिन सक्ने उल्लेख गर्यौं।
आज बिहान हामीले राष्ट्रपति पौडेल र प्रधानमन्त्री के.पी. शर्मा ओलीसँग पनि भेटवार्ता गर्न पायौं।
यी भेटघाटहरूमा हामीले क्षेत्रीय र विश्व सुरक्षा सम्बन्धी साझा चासोबारे चर्चा गर्यौं, र संयुक्त राष्ट्रसंघीय शान्ति मिसनमा नेपालले पुर्याएको महत्वपूर्ण सैनिक योगदानको कदर गर्यौं।
हामीले बहुपक्षीयताप्रतिको न्यूजील्याण्डको प्रतिबद्धता र नियममा आधारित अन्तर्राष्ट्रिय प्रणालीलाई संरक्षण गर्न सहकार्य गर्नुपर्ने आवश्यकताबारे पनि छलफल गर्यौं।
विश्वव्यापी व्यापार र आर्थिक प्रणालीमा परिरहेका विभिन्न दबाबहरूबारे र द्विपक्षीय सहकार्य कसरी सुदृढ गर्न सकिन्छ भन्ने विषयमा पनि छलफल भयो।
हामीले पर्यटन र व्यापार प्रवर्द्धनका लागि नेपाल र न्यूजील्याण्डबीच चाँडै नै हवाई सेवा सम्झौता (Air Services Agreement) गर्ने आकांक्षा राखेको कुरालाई पनि चर्चा गर्यौं।
न्यूजील्याण्ड सरकारले दक्षिण र दक्षिणपूर्वी एसियासँगको सम्बन्धलाई अझ सशक्त बनाउने प्रतिबद्धता लिएको छ, र हामी नेपाललाई यस क्षेत्रका हाम्रो सबैभन्दा पुराना र घनिष्ठ साझेदारहरूमध्ये एकको रूपमा हेर्छौं।
फेरि एकपटक मन्त्री देउवा, नेपाल सरकार र नेपाली जनतालाई हाम्रो प्रतिनिधिमण्डललाई अतिथ्य सत्कार गरिदिनु भएकोमा हार्दिक धन्यवाद, र हाम्रो मित्रवत् र सकारात्मक सम्बन्धलाई निरन्तरता दिएकोमा आभार प्रकट गर्दछु।
धन्यवाद।
