पाँच वर्षपछि डुनेडिन विमानस्थलमा पहिलो अन्तर्राष्ट्रिय उडान अवतरण गरेको छ। अष्ट्रेलियाको गोल्ड कोस्टबाट आएको यो पहिलो उडानसँगै डुनेडिनमा अन्तर्राष्ट्रिय उडान पुनः सुरु भएको हो।
अबदेखि जेटस्टारले डुनेडिन र गोल्ड कोस्टबीच साप्ताहिक तीनवटा उडान सञ्चालन गर्नेछ। यी उडानहरू मंगलबार, बिहीबार र शनिबार हुनेछन्। एअरबस A320 जहाज प्रयोग गरिने र वार्षिक ५८,००० सिट उपलब्ध हुने बताइएको छ। यो उडान ३.५ घण्टाको हुनेछ।
डुनेडिन विमानस्थलका प्रमुख कार्यकारी ड्यानियल डे बोनोले भने, ‘‘२००० को दशकको मध्यतिर यहाँ वार्षिक १ लाखभन्दा बढी अन्तर्राष्ट्रिय यात्रु आउँथे। बजार अहिले पनि छ भन्नेमा हामी विश्वस्त छौँ।’’
कोभिड-१९ महामारीका कारण अन्तर्राष्ट्रिय उडान रोकिएको थियो। तर, टिनएजर बेन्जामिन प्याटरसनले पुनः सुरु गर्न हस्ताक्षर अभियान थालेका थिए। उनको अभियानमा २५,००० भन्दा बढी हस्ताक्षर संकलन भएको थियो र उनले गत वर्ष प्रधानमन्त्रीसँग भेटेर यो मुद्दा उठाएका थिए। ‘‘पहिलो उडानमा सवार हुन पाउनु ठूलो सम्मान हो,’’ बेन्जामिनले बताए।
डुनेडिनका मेयर जुल्स राडिचले भने, ‘‘हामीसँग अहिले पर्याप्त होटेल र मोटेलको व्यवस्था छ। तर यदि आगन्तुकहरूको संख्या बाढीमा बदलियो भने, थप संरचना निर्माण गर्नेछौँ।’’
डुनेडिनका होटलहरू दीक्षान्त समारोह, कन्सर्ट र रग्बी खेलको समयमा भरिने गरेका छन्। तर पछिल्लो तथ्यांक अनुसार औसतमा डुनेडिनको होटल भरिएको दर ७०% मात्र देखिएको छ। पर्यटकहरूले औसतमा दुई रात डुनेडिनमा बस्छन् र वार्षिक ७५,००० रातको बुकिङ हुन्छ।
अष्ट्रेलियन पर्यटकले हाल डुनेडिनमा वार्षिक ३८ मिलियन डलर खर्च गर्दै आएका छन्।
जेटस्टारले ‘ओपन जॉ टिकेटिङ’ पनि सुरु गरेको छ, जसअनुसार यात्रुहरू डुनेडिन भित्रिएर क्विन्सटाउनबाट फर्कन सक्नेछन्।
डुनेडिनले फेरि अन्तर्राष्ट्रिय पर्यटनमा फर्किन थालेको यो संकेतलाई उत्साहपूर्वक लिइएको छ।
