अगस्ट महिनाको अन्तिम शुक्रबार न्युजिल्याण्डमा प्रत्येक वर्ष मनाइने (Daffodil Day) ड्याफोडिल डे यस वर्ष पनि मनाइँदैछ। क्यान्सर सोसाइटी अफ न्युजिल्याण्डले आयोजना गर्ने यो वार्षिक कोष संकलन अभियान क्यान्सर रोकथाम, अनुसन्धान तथा बिरामी र परिवारलाई आवश्यक सहयोग उपलब्ध गराउन महत्वपूर्ण मानिन्छ।
ड्याफोडिल डे के हो?
यो क्यान्सर सोसाइटीको प्रमुख वार्षिक कोष संकलन कार्यक्रम हो जसले क्यान्सरविरुद्ध लडिरहेका बिरामीहरूलाई सहयोग पुर्याउँछ। यस अवसरमा संकलित सहयोग रकम क्यान्सर रोकथामका कार्यक्रम, अत्याधुनिक अनुसन्धान तथा बिरामी र परिवारका लागि नर्सिङ, सामाजिक सहयोग, काउन्सेलिङ, उपचारका क्रममा यातायात र आवास सुविधामा प्रयोग गरिन्छ।
किन महत्वपूर्ण छ?
न्युजिल्याण्डमा हरेक तीनमध्ये एक जना नागरिक जीवनकालमा कुनै न कुनै प्रकारको क्यान्सरबाट प्रभावित हुने तथ्याङ्क छ। त्यसैले ड्याफोडिल डेबाट संकलित सहयोगले बिरामीलाई प्रत्यक्ष लाभ दिलाउनेछ। यस अभियानमार्फत संकलित रकमले नयाँ उपचार पद्धति विकासका लागि अनुसन्धानमा पनि योगदान पुर्याउँछ।
सहयोग कसरी गर्ने?
नागरिकहरूले यस अभियानमा अनलाइन daffodilday.org.nz मार्फत दान गर्न सक्नेछन्। साथै, एएनजेड (ANZ) बैंकका शाखाहरूमा दान गर्न वा सडकमा स्वयंसेवक सङ्कलक भेट्दा सहयोग गर्न सकिनेछ।
