राष्ट्रपति रामचन्द्र पौडेलले प्रधानमन्त्री केपी शर्मा ओलीको राजीनामा स्वीकृत गरेका छन्। तर नयाँ सरकार गठन नभएसम्म ओली कार्यवाहक प्रधानमन्त्रीको रूपमा कायम रहने भएका छन्।
जेन–जी आन्दोलन चर्किएपछि हिजो प्रधानमन्त्री ओलीले पदबाट राजीनामा दिएका थिए। लगत्तै राष्ट्रपति पौडेलले राजीनामा स्वीकृत गरे पनि नयाँ सरकार बन्ने प्रक्रियामा समय लाग्ने भएकाले ओली अस्थायी रूपमा पदमै बस्नेछन्।
यसबीच राष्ट्रपति, नेपाली सेना र जेन–जी आन्दोलनका प्रतिनिधिहरूमाझ छलफल हुने र अब छिट्टै अन्तरिम सरकार गठन हुने बताइएको छ। सम्भावित अन्तरिम सरकारमा गैरदलिय व्यक्तिको नेतृत्व हुनुपर्ने माग समेत उठिरहेको छ।
कयौँ युवाले काठमाडौं महानगरका मेयर बालेन्द्र शाहलाई नयाँ प्रधानमन्त्रीका रूपमा देख्न चाहेको बताइएका छन्। तर शाह स्वयंले यसबारे कुनै धारणा सार्वजनिक गरेका छैनन्।
अन्तरिम सरकार गठन भएपछि केही महिनामै नयाँ निर्वाचन हुने सम्भावना रहेको स्रोतहरूले जनाएका छन्।
