प्यालेस्टाइनको समर्थनमा शनिबार बिहान अक्ल्यान्डमा आयोजित ‘मार्च फर ह्युम्यानिटी’मा करिब २० हजार मानिसले सहभागिता जनाएका छन्। यो कार्यक्रम ‘एओटियारा फर प्यालेस्टाइन’ समूहले आयोजना गरेको हो।
प्रदर्शनकारीहरूले अक्ल्यान्डको क्विन स्ट्रीट हुँदै भिक्टोरिया पार्कसम्म जुलुस निकाल्दै गाजामा जारी युद्ध र मानवतावादी संकटको कारण इस्रायलमाथि तत्काल प्रतिबन्ध लगाउन न्यूजिल्याण्ड सरकारलाई आह्वान गरे।
‘एओटियारा फर प्यालेस्टाइन’की प्रवक्ता नादिन मोर्टाजाले भनिन्, “गाजामा भोकमरी र युद्धसँगै भयावह मानवीय स्थिति छ। न्यूजिल्याण्डले नैतिक र कानुनी दुवै दायित्व निर्वाह गर्दै तत्कालै इस्रायलमाथि प्रतिबन्ध लगाउनुपर्छ।”
एक प्रत्यक्षदर्शीले भने, “म क्विन स्ट्रीटको तलतिर छु र आधा घण्टादेखि मार्चरहरू लगातार अगाडि बढिरहेका छन्। अझै पनि मार्चको अन्त्य देखिँदैन।”
न्यूजिल्याण्ड प्रहरीले जारी गरेको विज्ञप्तिमा करिब २० हजारको सहभागिता भएको अनुमान गर्दै शान्तिपूर्ण रूपमा कार्यक्रम सञ्चालन गरेकोमा आयोजकलाई धन्यवाद दिएको छ। प्रहरीले कुनै उल्लेखनीय घटना नभएको जनाएको छ।
मार्चमा ग्रीन पार्टीकी सह–नेता मारामा डेविडसन र लेबर पार्टीका परराष्ट्र प्रवक्ता पेनी हेनेरेलगायत विपक्षी दलका नेताहरू पनि सहभागी थिए।
हेनेरेले विज्ञप्ति जारी गर्दै भने, “प्यालेस्टाइनलाई हाम्रो कार्य चाहिएको छ। क्रिस्टोफर लकसनको सरकार गाजामा भइरहेको नरसंहार रोक्न अझ धेरै काम गर्न सक्छ र गर्नैपर्छ – तत्काल प्रतिबन्ध लगाउनेसहित।”
उनले थपे, “एओटियाराको मानव अधिकार र न्यायका लागि उभिने गौरवमय इतिहास छ। यसको अर्थ तत्काल युद्धविरामको माग गर्ने, प्यालेस्टाइनलाई मान्यता दिने र इस्रायलको अवैध कब्जा र हिंसाका विरुद्ध प्रतिबन्ध लगाउने हो।”
