न्यूजील्याण्डमा ज्वरो, रुघा खोकीको असर अझै रोकिएन, के भन्छन् स्वास्थ्य विज्ञ ?

वेलिङ्टन- जाडो सकिँदै गर्दा पनि न्यूजील्याण्डमा लामो समयदेखि चलिरहेको फ्लुको लहर अझै रोकिएको छैन । लगातारको ज्वरो, खोकी र रुघाले न्यूज़ील्यान्डबासीलाई अझै पनि असर गरिरहेका छन्। विज्ञहरूका अनुसार यस वर्षको जाडोमा देखिएका रोगहरू सामान्यभन्दा फराकिलो र असामान्य रूपमा दीर्घकालीन भएका छन्।

ओटागो विश्वविद्यालयका सार्वजनिक स्वास्थ्यका प्राध्यापक माइकल बेकरका अनुसार तथ्याङ्कहरूले यस वर्षको फ्लु सिजन “लामो” भएको र सेप्टेम्बरसम्मै पुगेको देखाएको छ।

“न्यूजील्याण्डमा यस्ता जाडोमा देखिने संक्रमणहरूको घटनाको मापन गर्ने विभिन्न निगरानी प्रणालीहरू छन्। ती प्रणालीहरूले यस वर्ष श्वासप्रश्वाससम्बन्धी संक्रमणको लामो सिजन देखाइरहेका छन्, विशेष गरी हेल्पलाइनमा आएको फोनको संख्या उच्च स्तरमा पुगेको छ,” बेकरले भने।

उनका अनुसार फ्लु ट्र्याकिङ प्रणालीले पनि श्वासप्रश्वासजन्य रोगहरूको सिजन लामो भएको देखाइरहेको छ।

बेकरले भने, “इन्फ्लुएन्जा (फ्लु) को संक्रमण सामान्यतया अचानक सुरु हुन्छ र हलुका देखि गम्भीरसम्म हुन सक्छ। ज्वरो, काँपनी, खोकी, घाँटी दुखाइ, नाक बग्ने वा बन्द हुने, शरीर दुखाइ, टाउको दुखाइ र थकाइजस्ता लक्षणहरू क्लासिक लक्षण हुन्। यी लक्षणहरू कोभिड–१९ र साधारण रुघाखोकीसँग मिल्छन्, तर फ्लुमा ज्वरो र शरीर दुखाइ अचानक र बढी गम्भीर देखिन्छ।”

उनका अनुसार हालै मात्र न्यूजील्याण्डले कोभिड–१९ संक्रमणको सातौं लहर पार गरेको छ। “यो अझै पनि दैनिक सयौँलाई सङ्क्रमित गरिरहेको छ र पाँचदेखि दस जनासम्मलाई दैनिक अस्पताल भर्ना गराइरहेको छ,” उनले भने।

बेकरका अनुसार बालबालिकामा फ्लुको दर सबैभन्दा बढी हुन्छ किनभने उनीहरूको रोग प्रतिरोधात्मक क्षमता अझै विकास भइरहेको हुन्छ। “हाल दक्षिण टापुमा र पाँच वर्ष मुनिका बालबालिकामा फ्लु जस्ता लक्षण भएका हेल्पलाइन कलको दर सबैभन्दा उच्च छ,” उनले बताए।

उच्च आयु समूहका व्यक्तिहरू, विशेष गरी ६५ वर्ष माथिका, साथै दीर्घरोग भएका र गर्भवती महिला उच्च जोखिममा रहेको उनले बताए।

“यी सबै समूहहरूमा फ्लुका कारण अस्पताल भर्ना र मृत्युको जोखिम बढी हुन्छ, र प्रायः यिनीहरू प्रत्येक जाडोअघि निःशुल्क फ्लु खोप पाउने योग्यतामा पर्छन्,” बेकरले थपे।