न्युजील्याण्डका विभिन्न क्षेत्रमा बिहीबार आएको भीषण हावाहुरीले विद्युत् पोलहरू ढालिदिँदा र तारहरू चुडिँदा दशौँ हजार घरहरू अझै अन्धकारमा छन्। बिजुली कम्पनीहरूले जानकारी दिएका छन् कि केही स्थानमा बिजुली आपूर्ति सामान्य हुन केही दिन लाग्न सक्छ। दक्षिणी क्षेत्रमा पानीको अभाव हुन सक्ने भएकाले पानीको प्रयोग बचतपूर्वक गर्न समेत अनुरोध गरिएको छ।
हावाहुरी शान्त बन्दै गएपछि देशभर सफाइ र मर्मतकार्य सुरु भएको छ। धेरै ठाउँमा रुखहरू ढलेका छन्, छानाहरू उडेका छन्, र बार तथा गोठहरू हावाले उडाउन पुगेका छन्।
क्यान्टरबरी क्षेत्रमा वाइमाकारिरी नदीनजिकैका कायराकी र द पाइन्स बस्तीका सयौँ मानिसहरूलाई, साथै राकाया नदी नजिकका राकाया हट्स बस्तीका बासिन्दालाई बिहीबार राति बाढीको जोखिमका कारण सुरक्षित स्थानमा सार्न अनुरोध गरिएको थियो।
मेटसर्भिसका अनुसार अहिले मौसम केही स्थिर भए पनि सोमबार पुनः वर्षा र तेज हावाको सम्भावना रहेको छ।
बिहीबार २०० किलोमिटर प्रतिघण्टाभन्दा बढीको वेगमा चलेको हावाका कारण धेरै स्थानमा बिजुली मर्मतका टोलीहरू बाहिर निस्कनै सकेनन्। शुक्रबार मौसम सुधारिएपछि मर्मतकार्य तीव्र बनाइने अपेक्षा गरिएको छ तर क्षति व्यापक भएकाले सबै ठाउँमा पुग्न कठिनाइ भइरहेको छ। कतिपय सडकहरू अझै पोल र तारहरूले अवरुद्ध छन्।
सबैभन्दा ठूलो मात्रामा बिजुली कटौती तारारुआ, वाएरारापा, क्यान्टरबरी, ओटागो र साउथल्याण्ड क्षेत्रमा भएको छ। ओटागो र साउथल्याण्डमा मात्रै दसौँ हजार घरधुरी प्रभावित भएका छन्।
साउथल्याण्डमा बिजुली कटौतीका कारण खानेपानी र फोहोर व्यवस्थापन संयन्त्र पनि प्रभावित भएको छ। विशेष गरी टुआटापेरे, ओहाई, नाइटक्याप्स र ओटाउटाउका बासिन्दालाई अत्यावश्यक भए मात्र पानी प्रयोग गर्न, धारो नखोल्न, र फ्लस नगर्न आग्रह गरिएको छ।
साउथल्याण्डका मेयर रोब स्कटले जनतालाई पानीको प्रयोगमा संयम अपनाउन अपील गरेका छन्।
वाका कोताहीका अनुसार क्यान्टरबरी, वेस्ट कोस्ट, ओटागो र साउथल्याण्डका धेरै राज्य राजमार्गहरू बिहीबार राति बन्द गरिएको थियो। धेरै सडकहरूमा रुख र बिजुलीका तारहरू फैलिएका थिए र कतिपय ठाउँमा बाढी पनि आएको थियो।
सडक बन्दको अवस्था शुक्रबार बिहान पुनः मूल्याङ्कन गरिने जनाइएको छ। जनतालाई ताजा जानकारीका लागि वाका कोताहीको वेबसाइट हेर्न सल्लाह दिइएको छ।
