लेबर पार्टीले सरकारद्वारा भारतसँग सम्पन्न स्वतन्त्र व्यापार सम्झौता (एफटीए) लाई समर्थन गर्ने–नगर्नेबारे हाल स्पष्ट धारणा नदिएको छ। तर यो सम्झौता पार्टीले समर्थन गर्ने दिशातर्फको “सकारात्मक कदम” जस्तो देखिएको स्वीकार गरेको छ।
लेबरका व्यापार प्रवक्ता डेमियन ओ’कोनरले सम्झौता ढिला गरेर अझ राम्रो सर्त हासिल गर्न सकिन्थ्यो कि सकिँदैन भन्ने विषयमा आफू अहिले केही भन्न सक्ने अवस्थामा नरहेको बताए।
“हामीले अवसर समात्नैपर्छ,” उनले भने, “उपभोक्ता बजारमा ठूलो परिमाणमा दुग्धजन्य पदार्थ पुर्याउने लक्ष्य कहिल्यै यथार्थपरक थिएन।”
ओ’कोनरले सरकारमा रहँदा पनि लेबरले यही कुरा स्पष्ट रूपमा भनेको र त्यसका लागि आलोचना समेत खेप्नुपरेको स्मरण गराए। उनका अनुसार यस सम्झौताको दीर्घकालीन मूल्य भनेको भारतसँगको साझेदारी विस्तार गर्नु नै हो।
सरकारले सोमबार भारतसँगको स्वतन्त्र व्यापार वार्ता टुंगिएको पुष्टि गरेको थियो। सम्झौताले किवीफ्रुट, स्याउ, मासु, ऊनलगायत विभिन्न उद्योगलाई महत्वपूर्ण फाइदा दिलाउने अपेक्षा गरिएको छ भने दुग्धजन्य क्षेत्रमा भने सीमित लाभ मात्र देखिएको छ।
प्रधानमन्त्रीले उक्त सम्झौतालाई “उच्च गुणस्तरको सम्झौता” भन्दै यो न्युजिल्यान्डको प्रतिस्पर्धात्मक क्षमतासँग सम्बन्धित रहेको बताएका छन्। तर न्युजिल्यान्ड फर्स्टका नेता विन्स्टन पिटर्सले भने यसलाई “निम्न गुणस्तरको सम्झौता” भन्दै समर्थन रोक्ने घोषणा गरेका छन्।
गत साता मन्त्रिपरिषद्बाट सम्झौताको स्वीकृति लिँदा न्युजिल्यान्ड फर्स्टले गठबन्धनको ‘असहमति स्वीकार’ प्रावधान प्रयोग गरेको थियो। पार्टीले संसदमा सम्झौता कार्यान्वयनका लागि कानुन पेस भएमा त्यसको विपक्षमा मतदान गर्ने स्पष्ट पारेको छ।
