न्युजील्याण्डका धेरै क्षेत्रमा भारी वर्षा र शक्तिशाली हावाहुरीको चेतावनी

न्युजील्याण्ड — देशका धेरै भागमा बुधबार भारी वर्षा र शक्तिशाली हावाहुरीको जोखिम बढेको छ। मेटसर्भिसका अनुसार उत्तरतर्फबाट बुधबार देशतर्फ अघि बढ्दै गरेको उष्णकटिबन्धीय न्यूनचापअघि बलियो र आर्द्र पूर्वी वायु सक्रिय भएपछि मौसम प्रतिकूल बन्ने संकेत देखिएको हो।

बुधबारदेखि विभिन्न क्षेत्रमा लगातार पानी पर्ने र पूर्वी दिशाबाट तीव्र हावा चल्ने सम्भावना छ। यसले बाढी, डुबान, पहिरो र यातायात अवरुद्ध हुने जोखिम बढाउन सक्छ। न्यूनचाप प्रणाली देश पार गरेपछि बिहीबारदेखि वर्षा र हावाको प्रभाव क्रमशः कम हुँदै जाने अनुमान गरिएको छ।

मेटसर्भिसले मेघगर्जनका कारण प्रति घण्टा २५ मिलिमिटर वा सोभन्दा बढी वर्षा, २० मिलिमिटरभन्दा ठूलो असिना, ११० किमी प्रतिघण्टा वा सोभन्दा बढीको हावाको झोका देखिएमा त्यसलाई गम्भीर मेघगर्जनको रूपमा वर्गीकरण गर्ने जनाएको छ। साथै ११६ किमी प्रतिघण्टाभन्दा बढी वेगका टोर्नाडो देखिएमा उच्च जोखिम मानिनेछ।

त्यसैगरी ६ घण्टामा ५० मिलिमिटरभन्दा बढी वा २४ घण्टामा १०० मिलिमिटरभन्दा बढी व्यापक वर्षा, अथवा औसत ९० किमी प्रतिघण्टाभन्दा बढीको तीव्र हावाहुरी चलेमा गम्भीर मौसम चेतावनी जारी गरिनेछ। केही क्षेत्रहरूमा भू–भौगोलिक संवेदनशीलताका कारण फरक मापदण्डसमेत लागू हुने मेटसर्भिसले जनाएको छ।

गम्भीर मौसम चेतावनीहरूलाई अपेक्षित प्रभावको आधारमा ओरेन्ज र रेड श्रेणीमा वर्गीकरण गरिन्छ। अधिकारीहरूले सर्वसाधारणलाई सतर्क रहन, अनावश्यक यात्रा नगर्न र स्थानीय निकाय तथा मेटसर्भिसबाट जारी हुने आधिकारिक सूचनाहरू नियमित रूपमा पछ्याउन आग्रह गरेका छन्।