242
Shares
न्युजील्याण्डकी अनुभवी राजनीतिज्ञ तथा रक्षा मन्त्री जुडिथ कोलिन्सले सक्रिय राजनीतिबाट अवकाश लिने घोषणा गरेकी छन्। उनले आगामी आमनिर्वाचनमा उम्मेदवारी नदिने स्पष्ट पार्दै संसद् सदस्यको भूमिकाबाट बाहिरिने निर्णय गरेकी हुन्। २४ वर्षभन्दा लामो समय संसद्मा सेवा गरेकी कोलिन्सलाई न्युजील्याण्डको कानुन आयोगको नयाँ अध्यक्षमा नियुक्त गरिएको छ। यो आयोग न्युजील्याण्डको कानुनी सुधार र नीतिगत सिफारिसका लागि जिम्मेवार स्वतन्त्र निकाय हो। उनी सन् २०२६ को मध्यतिरदेखि औपचारिक रूपमा उक्त जिम्मेवारी सम्हाल्ने बताइएको छ।
सन् २००२ देखि निरन्तर संसद् सदस्य रहँदै आएकी कोलिन्स न्युजील्याण्डको इतिहासमा सबैभन्दा लामो समय निरन्तर सेवा गर्ने महिला सांसदहरूमध्ये एक मानिन्छिन्। उनले रक्षा, न्याय, प्रहरी, सुधारगृह, एसीसी लगायतका महत्वपूर्ण मन्त्रालयहरू सम्हालिसकेकी छन्। सन् २०२०–२१ मा उनले New Zealand National Party को नेतृत्त्व गर्दै विपक्षी दलको नेताको भूमिका पनि निर्वाह गरेकी थिइन्।
कोलिन्सले अब राजनीतिक भूमिकाबाट टाढा रहँदै कानुनी क्षेत्रमा आफ्नो अनुभव प्रयोग गर्न चाहेको बताएकी छन्। उनको नियुक्तिलाई प्रधानमन्त्री तथा विभिन्न राजनीतिक नेताहरूले स्वागत गर्दै कानुनी सुधारमा उनको योगदान महत्वपूर्ण हुने विश्वास व्यक्त गरेका छन्।
