276
Shares
न्युजील्याण्डको Mount Maunganui स्थित Beachside Holiday Park मा गएको पहिरो दुर्घटनामा ६ जनाको ज्यान गएको आधिकारिक रूपमा पुष्टि भएको छ। अत्यधिक वर्षापछि २२ जनवरी २०२६ मा भएको उक्त पहिरोले क्याम्पसाइटका शौचालय, स्नानगृह, टेन्ट तथा क्याम्परभ्यानहरू पुरिँदा दर्जनौँ मानिस प्रभावित भएका थिए।
न्युजील्याण्ड प्रहरीले लामो खोज तथा उद्धारपछि सबै बेपत्ता व्यक्तिहरूको औपचारिक पहिचान सम्पन्न भएको जनाएको छ। प्रारम्भिक उद्धार प्रयासपछि बाँच्ने सम्भावना नरहेको निष्कर्षसहित खोज कार्यलाई शव उद्धारमा रूपान्तरण गरिएको थियो।
प्रहरीका अनुसार, पहिरोले क्याम्पसाइटको संरचनामा गम्भीर क्षति पुर्याएको थियो। घटनास्थलको भू–संरचना, निरन्तर वर्षा र जमिनको अस्थिरताका कारण उद्धार कार्य जोखिमपूर्ण बनेको बताइएको छ।
न्युजील्याण्ड प्रहरी, आपतकालीन सेवा, नागरिक सुरक्षा र स्वयंसेवकहरूको संयुक्त प्रयासमा खोज तथा उद्धार सम्पन्न गरिएको हो। अधिकारीहरूले मृतक परिवारप्रति गहिरो समवेदना व्यक्त गर्दै शवहरू परिवारलाई हस्तान्तरण गरिने प्रक्रिया अघि बढाइएको जनाएका छन्।
यो दुर्घटनाले मौसमीय जोखिम, पहिरो सम्भावित क्षेत्रको व्यवस्थापन तथा क्याम्पसाइट सुरक्षाबारे गम्भीर प्रश्न उठाएको छ। सम्बन्धित निकायहरूले घटनाको विस्तृत अनुसन्धान जारी राखेका छन्।
