193
Shares
न्युजिल्याण्डको नर्थ आईल्याण्डका विभिन्न भागमा शुक्रबारदेखि भारी वर्षा हुने पूर्वानुमानसँगै चेतावनी जारी गरिएको छ। देशभर आर्द्र (ह्युमिड) मौसम प्रणाली फैलिन लागेकाले व्यापक वर्षाको सम्भावना देखिएको मौसमविद्हरूले जनाएका छन्।
मौसम निकायले बे अफ प्लेण्टीको Ōpōtiki क्षेत्रको पूर्वी भाग र गिसबोर्न/तैराव्हितीको टोलागा बे (Tolaga Bay) को उत्तर क्षेत्रमा शुक्रबार राति ८ बजेदेखि शनिबारसम्मका लागि ‘ओरेन्ज हेभी रेन वार्निङ’ जारी गरेको छ।
पूर्वानुमान अनुसार ती क्षेत्रमा ८० देखि १०० मिलिमिटर वर्षा हुने अपेक्षा गरिएको छ भने केही स्थानमा १३० देखि १५० मिलिमिटरसम्म पानी पर्न सक्ने सम्भावना रहेको छ। छोटो समयमा अत्यधिक वर्षा हुँदा बाढी, पहिरो तथा सडक अवरुद्ध हुने जोखिम बढ्न सक्ने बताइएको छ।
शुक्रबार नर्थ आईल्याण्डभर मौसम बदली रहनेछ। कतिपय क्षेत्रमा मेघगर्जनसहित वर्षा र स्थानीय रूपमा तीव्र पानी पर्ने सम्भावना पनि रहेको छ। विशेषगरी नदी किनार र पहाडी भेगका बासिन्दालाई सतर्क रहन आग्रह गरिएको छ।
अधिकारीहरूले यात्रा गर्दा सावधानी अपनाउन, मौसम अपडेट नियमित रूपमा हेर्न र आकस्मिक अवस्थाका लागि तयारी अवस्थामा रहन सर्वसाधारणलाई सुझाव दिएका छन्।
