नेपाली राष्ट्रिय महिला फुटबल टोलीकी कप्तान सावित्रा भण्डारी ‘साम्बा’ आज न्युजिल्याण्डबाट कतार प्रस्थान गरेकी छिन्। न्युजिल्याण्डमै खेल्ने क्रममा घुँडामा गम्भीर चोट लागेपछि उनी हाल मैदानबाहिर छिन्। उपचारका लागि आर्थिक सहयोग आवश्यक परेको भन्दै उनले गत सोमबार सामाजिक सञ्जालमार्फत अपिल गरेकी थिइन्, र अपिल गरेको २४ घण्टाभित्रै आवश्यक करिब डेढ करोड रुपैयाँ संकलन भएको थियो। न्युजिल्याण्डसहित विश्वभर रहेका नेपाली समर्थकको सहयोगले ठूलो रकम जुटेपछि उनले सबै सहयोगदाताप्रति आभार व्यक्त गरेकी छन्।
साम्बा आबद्ध क्लब वेलिङटन फोनिक्सले न्युजिल्याण्डमै उपचार गराउने र सम्पूर्ण खर्च व्यहोर्ने प्रस्ताव गरेको थियो। नेपालका केही अस्पतालले पनि निःशुल्क उपचार गर्ने इच्छा देखाएका थिए। तर उनले उपचारका लागि कतारस्थित विश्वप्रसिद्ध अस्पेटार अस्पताल रोज्ने निर्णय गरिन्, जसले सामाजिक सञ्जालमा व्यापक बहस समेत सिर्जना गरेको छ।
साम्बाका अनुसार उनको प्राथमिकता केवल शल्यक्रिया मात्र नभई उपचारपछि बलियो रूपमा मैदान फर्किनु हो। यसअघि पनि उनले सोही अस्पतालमा घुँडाको सफल शल्यक्रिया गराएकी थिइन् र त्यसपछि अन्तर्राष्ट्रिय फुटबलमा उत्कृष्ट प्रदर्शन गर्दै न्युजिल्याण्ड, फ्रान्स, इजरायल र भारतका लिगमा नेपाली फुटबलको पहिचान स्थापित गरेकी थिइन्। हाल घुँडाको एसीएल र एमसीएलमा गम्भीर समस्या देखिएकाले पुनः शल्यक्रिया आवश्यक परेको छ।
नेपाली फुटबल इतिहासमै सर्वाधिक ५९ अन्तर्राष्ट्रिय गोल गरिसकेकी साम्बाको उपचार यात्रा अहिले केवल व्यक्तिगत संघर्ष मात्र नभई न्युजिल्याण्डमा खेल्दा लागेको चोट, संस्थागत सहयोगको कमी र समर्थकको ऐक्यबद्धताको प्रतीक बनेको छ। सफल उपचारपछि अझ सशक्त रूपमा मैदान फर्किने लक्ष्यसहित उनी आज न्युजिल्याण्डबाट कतार प्रस्थान गरेकी छिन्।
