141
Shares
न्युजिल्याण्डको बैंकिङ क्षेत्रमा मध्यपूर्वमा जारी द्वन्द्वको असर देखिन थालेको छ। Bank of New Zealand (बीएनजेड) ले मार्च ३१ सम्मको ६ महिनामा ४९४ मिलियन डलरको अर्धवार्षिक खुद नाफा सार्वजनिक गरेको छ, जुन अघिल्लो वर्षको तुलनामा ३०१ मिलियन डलर अर्थात् ३७.९ प्रतिशतले कम हो।
बैंकका अनुसार नाफामा आएको गिरावट मुख्यतः पूँजीकृत सफ्टवेयर सम्पत्तिमा गरिएको “एकपटक मात्र हुने” समायोजनका कारण भएको हो। उक्त प्रभाव हटाउँदा नाफा ७४७ मिलियन डलर रहने थियो, जसले तुलनात्मक रूपमा कम गिरावट देखाउँछ।
बीएनजेडले ९९५ मिलियन डलर बराबरको कर्जा जोखिम प्रावधान कायम गरेको छ, जसमा मध्यपूर्व द्वन्द्वका सम्भावित असरलाई ध्यानमा राख्दै थप समायोजन गरिएको छ। बैंकहरूले यस्तो प्रावधान सम्भावित ऋण असुली जोखिमका लागि छुट्याउने गर्छन्।
बीएनजेडका प्रमुख कार्यकारी अधिकृत Dan Huggins का अनुसार उक्त नतिजाले द्वन्द्वअघि न्युजिल्याण्डको अर्थतन्त्रमा देखिएको सुधारको संकेत दिएको भए पनि पछिल्लो अवस्थाले त्यो सकारात्मकता कमजोर बनाएको छ।
प्रतिवेदनअनुसार घर कर्जा ६.६ प्रतिशत र व्यवसायिक कर्जा २.२ प्रतिशतले बढेको छ भने कुल कर्जा ४.७ प्रतिशतले वृद्धि भई ११३.६ अर्ब डलर पुगेको छ।
तर इन्धन मूल्य वृद्धिसहितको वैश्विक अस्थिरताले उपभोक्ता र व्यवसाय दुवैलाई पुनः सावधानी अपनाउन बाध्य बनाएको बैंकले जनाएको छ।
ग्राहक निक्षेप पनि ५.३ प्रतिशतले बढेर ८९.९ अर्ब डलर पुगेको छ। यद्यपि, बैंकको नाफा सूचक ‘नेट इन्टरेस्ट मार्जिन’ घट्नुले बजारमा बढ्दो प्रतिस्पर्धा देखाएको छ।
यसैबीच, प्रतिस्पर्धी ANZ ले पनि हालै १.२३८ अर्ब डलरको अर्धवार्षिक नाफा सार्वजनिक गर्दै मध्यपूर्वको द्वन्द्वले सिर्जना गरेको विश्वव्यापी अनिश्चितताबारे चिन्ता व्यक्त गरेको थियो।
विश्लेषकहरूका अनुसार बीएनजेडको नतिजाले बाह्य द्वन्द्व र इन्धन मूल्य वृद्धिले न्युजिल्याण्डको वित्तीय प्रणालीमा पारिरहेको प्रभाव स्पष्ट रूपमा देखाएको छ।
