भारतीय प्रधानमन्त्री नरेन्द्र मोदीको न्युजिल्याण्ड भ्रमणको अवसरमा अकल्याण्डमा भोली विरोध प्रदर्शन आयोजना गरिने भएको छ। विभिन्न मानवअधिकार तथा सिख समुदायसँग सम्बन्धित केही समूहहरूले प्रदर्शनको आह्वान गर्दै सामाजिक सञ्जालमार्फत प्रचार सामग्री सार्वजनिक गरेका छन्।
प्रदर्शन भोली दिउँसो २ बजे अकल्याण्डस्थित स्पार्क एरेना बाहिर आयोजना गर्ने योजना छ। प्रदर्शनकारीहरूले मानवअधिकार, अभिव्यक्ति स्वतन्त्रता तथा अन्तर्राष्ट्रिय दमनसम्बन्धी विषय उठाउँदै आफ्नो विरोध जनाउने बताएका छन्।
पोस्टरमा “Modi Not Welcome” लगायतका नारा प्रयोग गरिएको छ भने भारत सरकारको नीतिप्रति असन्तुष्टि व्यक्त गरिएको छ। साथै केही पोस्टरमा खालिस्तान जनमतसंग्रह सम्बन्धी मागहरू समेत समावेश गरिएको देखिन्छ।
उता, प्रधानमन्त्री मोदीको भ्रमणलाई मध्यनजर गर्दै न्युजिल्याण्ड प्रहरीले अकल्याण्ड क्षेत्रमा विशेष सुरक्षा व्यवस्था मिलाएको छ। विदेशी राष्ट्रप्रमुखको भ्रमणका क्रममा सुरक्षा सतर्कता बढाउनु नियमित प्रक्रिया भएको अधिकारीहरूले बताएका छन्।
यद्यपि, प्रदर्शन आयोजकहरूको दाबी र पोस्टरमा उल्लेख गरिएका आरोपहरूबारे स्वतन्त्र रूपमा पुष्टि भएको छैन। भारतीय सरकारले यस्ता आरोपहरू विगतमा अस्वीकार गर्दै आएको छ।
प्रहरीले प्रदर्शन शान्तिपूर्ण रूपमा गर्न, कानुनको पालना गर्न तथा सार्वजनिक सुरक्षामा असर नपर्ने गरी आफ्ना अधिकार प्रयोग गर्न सबैलाई आग्रह गरेको छ।
यसैबीच, प्रधानमन्त्री मोदीको न्युजिल्याण्ड भ्रमणका क्रममा दुवै देशबीच व्यापार, लगानी, शिक्षा, सुरक्षा तथा इन्डो–प्यासिफिक क्षेत्रीय सहकार्यलगायतका विषयमा उच्चस्तरीय छलफल हुने अपेक्षा गरिएको छ।
