न्यूजील्याण्डमा नेपाली समुदायबीच चाडपर्व नजिकिँदै जाँदा अनलाइन व्यवसाय, विशेषगरी महिला कपडा साडी, कुर्ता, गाउन, लेहेङ्गा आदिको कारोबारमा उल्लेखनीय वृद्धि भएको देखिएको छ।
तीज, दशैं र तिहार जस्ता परम्परागत चाडपर्वहरूलाई लक्षित गर्दै यहाँ बसोबास गर्ने नेपाली व्यवसायीहरू, विशेषगरी महिलाहरूले फेसबुक, इन्स्टाग्राम, टिकटक जस्ता सामाजिक सञ्जालमार्फत अनलाइन बिक्री बढाएका छन्। उनीहरू विभिन्न डिजाइनका नेपाली तथा भारतीय पहिरनहरू आयात गरी घरैबाट व्यवसाय सञ्चालन गरिरहेका छन्।
ग्राहकले सजिलै अर्डर गर्न सक्ने, घरमै सामान प्राप्त गर्ने सुविधा र पारिवारिक तथा सांस्कृतिक चाडको तयारी गर्ने उद्देश्यले यस्ता व्यवसायहरू निकै लोकप्रिय बन्दै गएका छन्।
कसैले आफ्नो रुचिलाई व्यवसायमा रूपान्तरण गरिरहेका छन् भने कसैले आर्थिक आत्मनिर्भरता हासिल गर्न सानो लगानीबाट सुरु गरेका छन्। विशेष अफर, छूट र मौसमी कलेक्सनहरूमार्फत व्यवसायीहरू ग्राहक आकर्षित गर्ने प्रयासमा छन्।
यस किसिमको प्रवृत्तिले न्यूजील्याण्डमा रहेका नेपालीहरूलाई आफ्नो संस्कृति र चाडपर्वसँग जोडिराख्नुका साथै महिला उद्यमशिलतालाई पनि प्रवर्द्धन गरिरहेको छ।
अनलाइनमार्फत सञ्चालन हुने यस्ता लघु व्यवसायहरू नेपाली समुदायभित्रको आर्थिक गतिविधिमा सकारात्मक योगदान पुर्याइरहेका छन्।
