भारतीय टेलिभिजन शो ‘तारक मेहताका उल्टा चश्मा’मा ‘नट्टू काका’को भूमिका निर्वाह गरेर चर्चित बनेका अभिनेता घनश्याम नायकको ७७ वर्षको उमेरमा निधन भएको छ । उनको क्यान्सरबाट निधन भएको हो । घनश्यामको निधनको पुष्टि शोका निर्माता असित मोदीले गरेका छन् । ‘हाम्रो प्रिय नट्टु काका हामीमाझ रहेनन् । परम कृपालु परमेश्वर उनलाई आफ्नो चरणमा स्थान दिनुहोला र परम शान्ति दिनुहोला । उनको परिवारलाई यो दुःख सहन सक्ने शक्ति दिऊन । नटु काका हामी तपाईंलाई भुल्न सक्दैनौं,’ असितले सामाजिक सञ्जालमा लेखेका छन् । घनश्यामका छोरा विकासका अनुसार तीन महिना अघि घनश्यामको घाँटीमा केही गाँठा देखिएका थिए । जसका कारण उनको उपचार सुरु भएको थियो । गत वर्ष उनको घाँटीको अपरेसन गरेर ८ गाँठा निकालिएको थियो । निरन्तर उपचार पछि उनको स्वास्थ्यमा सुधार आएको थियो । घनश्याम टेलिभिजनमा मात्र होइन, कैयौं फिल्ममा पनि काम गरेका थिए । सन् १९६० मा अशोक कुमारको फिल्म ‘मासूम’बाट बाल कलाकारका रुपमा अभिनय यात्रा थालेका उनले ‘बेटा’, ‘तिरंगा’, ‘आंखें’, ‘लाडला’, ‘क्रान्तिवीर’, ‘आन्दोलन’, ‘बरसात’लगायतका फिल्ममा अभिनय गरेका थिए ।
