कुक आइल्यान्ड सरकारले रारोटोङ्गा टापुमा डेंगु ज्वरोको प्रकोप घोषणा गरेको छ। स्वास्थ्य मन्त्रालयले बिहीबार (न्यूजील्याण्ड समय अनुसार शुक्रबार) दुई नयाँ डेंगु संक्रमण पुष्टि गरेपछि कुल संक्रमितको संख्या सात पुगेको जनाएको छ ।
स्वास्थ्य मन्त्रालयका अनुसार, हालैको वर्षा र आर्द्रताले लामखुट्टेको सक्रियता बढाएको छ, जसले डेंगु फैलन सक्ने जोखिम बढाएको छ। सबै स्वास्थ्य केन्द्रहरू सतर्क अवस्थामा छन् र थप संक्रमणको व्यवस्थापन गर्न तयार छन्।
सरकारले “अपरेशन नामु२५” अन्तर्गत रारोटोङ्गामा सामुदायिक सरसफाइ, लामखुट्टे नियन्त्रण, प्रभावित क्षेत्रमा कीटनाशक छर्कने, र बाह्य टापुहरूसँग समन्वय गर्ने कार्यक्रम सुरु गरेको छ। स्थानीय परिषदहरू र अन्य निकायहरू यस राष्ट्रिय प्रयासमा सहभागी छन्।
बाह्य टापुहरूमा पनि स्थानीय प्रतिक्रिया योजनाहरू तयार पारिँदै छन्। स्वास्थ्य सचिव बब विलियम्सले भने, “हामी सबैले मिलेर डेंगु फैलनबाट हाम्रो समुदायलाई जोगाउनुपर्छ।”
हाल यात्रा प्रतिबन्ध छैन, तर यात्रुहरूलाई सावधानी अपनाउन सल्लाह दिइएको छ। स्वास्थ्य मन्त्रालयले विश्व स्वास्थ्य संगठन (WHO) र क्षेत्रीय स्वास्थ्य साझेदारहरूलाई पनि जानकारी गराएको छ।
