सगरमाथा आरोहणको ऐतिहासिक उपलब्धिलाई स्मरण गर्दै न्युजिल्याण्डका विभिन्न सहरमा एभरेस्ट डे मनाइएको छ।
सन् १९५३ मे २९ मा न्युजिल्याण्डका पर्वतारोही सर एडमन्ड हिलारी र नेपाली पर्वतारोही तेन्जिङ नोर्गे ले विश्वको सर्वोच्च शिखर सगरमाथाको सफल आरोहण गरेका थिए। उक्त ऐतिहासिक उपलब्धिको सम्मानमा ह्यामिल्टन र इनभरकार्गिलमा विशेष कार्यक्रम आयोजना गरिएको हो।
कार्यक्रममा एक हजारभन्दा बढी नेपाली तथा स्थानीय समुदायका सदस्यहरूको सहभागिता रहेको आयोजकहरूले बताएका छन्। ह्यामिल्टनस्थित ह्यामिल्टन गार्डेन्समा ७ सयभन्दा बढी र इनभरकार्गिलस्थित ह्यान्सेन हलमा करिब ३ सय जना सहभागी भएका थिए।
नेपाल न्युजिल्याण्ड वाइकाटो फ्रेन्डसिप सोसाइटी र साउथल्यान्ड नेपाली समाजको सह-आयोजनामा सम्पन्न कार्यक्रममा विभिन्न अतिथि, सांसद, मन्त्री तथा सामुदायिक अगुवाहरूको उपस्थिति रहेको थियो।
कार्यक्रममार्फत सगरमाथा आरोहणको ऐतिहासिक उपलब्धि, नेपाल–न्युजिल्याण्ड मित्रता तथा नेपाली समुदायको योगदानलाई सम्मान गरिएको आयोजकहरूले बताएका छन्।
